Kündelikniñ devamı, başı mında.
Qayda: Rusiye, Rostov-na-Donu şeeri, Bölge arbiy mahkemesi, eski bina.
Ne vaqıt: 2021 senesi martnıñ 23.
Bazarertesi künü davamıznıñ maiyeti üzre ekinci oturış başlandı. Bu sefer SİZO «vokzalında» pek çoq tavqifli bar edi. Biri sigara içe edi, biri uquq vesiqalarnı oquy edi, ekseriyet öz arası laf ete edi. Bugün, uzun müddet içinde G25 büyük gruppamızdan olğan «cinayetdeşlerimizni» körip oldıq. Veli Abdulkadırovnıñ gruppası da bizim kibi mahkemege berildi.
Er vaqıt kibi bir-birimizni pek samimiyetnen qarşılap aldıq. Quşaqlaşıp, SİZO-daki, etap vaqtındaki maceralarımız aqqında aytıp berdik, diger meselelerge dair teessuratlarımıznen paylaştıq. Qardaşlarımıznıñ aytıp bergenine köre, mında olar bir çoq qıyınlıqlarğa rakstkelgenler.
Birincide, sıqlaşqan tintüvler. Qısqa müddet içinde tevqiflilerden çoq şey tutıp alınğan. Bularnıñ arasında tuvğanlarınen laf etmek içün qullanğan alâqa vastaları. Bulunğanlardan çoqusı bunıñ Putinniñ SİZO-da alâqa bloklavına dair ferman imzalanmasına cevap olğanını qabul etti. Ekincide, SİZO-daki yaramay şarait.
«Qardaşım, tışarıda suvq olğanını istep dua etem! Azıq malalrım bozula... Ve bu sıcaq olğanından degil, kamera suvuq olğanı içün kurka kiyip yürem», – bir aydan berli mahsus blokta tutulğan dostum Veli teessuratlarınen paylaştı.
Qardaşım, tışarıda suvq olğanını istep dua etem!Veli Abdulkadırov
Amma eñ qıyını Kavkazdan olğan qardaşlarnen munasebetler oldı. Çatışmalar, añlaşılmamazlaq er bir kamerda ola edi desek olacaq. Bazı vaqıtları Qırımdan olğanlarğa takfir ilân etile edi.
Men ile bir kamerada oturğan Kemal dey ki: «Men bütün bularnı dagestan apishanelerinden kördim. Menimce bu sırf Kavkaz mevzusı. Genç ballar islâm dininiñ esaslarını ögrenip, aytqan sözleri ne qadar ciddiy olğanını añlamaylar».
Biraz vaqıt soñra Veli Abdulkadırovnıñ gruppasınıñ mahkeme otruşı lâğu etilgen belli oldı.
Bizni ise, dörtümizni, Arbiy mahkemeniñ binasına ketirler. Konvorler birer-birer bizni zalğa kirseteler. «O, küçük keldi külip», – şaqa ete polis hadimi, – «Kel men seni akvariumğa alıp keteyim.
(Devamı bar)
Remzi Bekirov, Qırımlı siyasiy mabüs, vatandaş jurnalisti, uquq qoruyıcı teşkilâtlar tarafından siyasiy mabüs kibi tanılğan
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.