Mahkemelerden birinde dostum ve ortağım Riza İzetov maña şöyle dedi: «Dekabrniñ 10-nda apishanede 1000-inci künümiz olacaq!» E, 1000 kün! Baqsa, o qadar vaqıt keçken eken, dep tüşündim men.
Bu vaqıt devamında çoq şey oldı. Eñ esasını siznen beraber hatırlamağa tırışacam. 2019 senesi martnıñ 27-28-i – Qırımda qırımtatarlar, musulmanlarnıñ kütleviy tutuluvı, men ve dostlarım Aksay şeerinde (Rostov vilâyeti) qara urbada adamlar (OMON, SOBR) tarafından tutulamız, Rostov-na-Donu orman yolağında bizni kötekleyler. Köteklegen soñ bizni arqada qırçmanen Qırımğa alıp keteler. Aqmescit, FSB, birinci mahkeme – zalda bir tanışımız yoq, amma bina ögünde sıcaq qoltutuv bar. SİZOda ilk gece, Rostov-na-Donuğa etap, FSB rejim apishanesi, kene Qırım, Aqmescit SİZOsı – çamur, dımlılıq, polisniñ lâqaytlığı, tanuv, cinaiy davanı incelev, psihiatrik hastahanesingde bir ay, Rostovğa yañı sürgünlik, yañı arbiy mahkeme, musulmanlarğa qarşı bir sıra repressiya. Ükümge daa çoq barmı? To be continued.
Bu vaqıt devamında uquq qoruyıcılarınıñ «aqlarına riayet etüv», apishane tibbiyeti, kör Rusiye adliyesi, farqlı fikirler içün siyasiy repressiyalar kibi menfiy şeylerni yahşı kördim ve is ettim.
Mında, apishanede, qardaşlıq ayrı, sınavlar insannı aça
Bu menfiy taraflardan ğayrı, müsbet şeyler de oldı. «Quvetçilerge meni apishanege qapatqanları içün minnetdarım, çünki bu yerde kerçek qardaşlıq ne olğanını añladım!» – dep beklenilmegen bir vaqıtta ayttı İzetov Riza birinci mahkemede. Ebet, dostumnen bütünley razım, bir şey qoşacam: bu sınav içün quvetçilerge degil, Rabbime minnetdarım. Mında, apishanede, qardaşlıq ayrı, sınavlar insannı aça. Esarette eñ soñki, eñ qıymetli şeyni paylaşasıñ, bazıda dostlarıñ basqığa oğrasa, olarnı qorçalaysıñ.
Aqmescit SİZOmıznı ne içün Yusufnıñ medresesi dep adlandırğanlarını bildim. Bir çoq insan mında islâm aqqında bilgi ala, mında er vaqıt ezan çağırıla, mında siyasiy mabüsler iman, halq, fikirleri içün tutula. «Ey Rabbim! Zindan maña, bularnıñ meni davet etken şeyinden daa sevimlidir» – Yusuf Peyğamberniñ oña Rabbiniñ yasağını bozıp boysunmağa emir etilgen zor bir sınav vaqtında Quran-ı Kerimde Allahqa böyle hitap ete. Razı olmasa, adlı-sanlı, dülber qadın onı zindannen qorquzğan edi. Yusuf soñkisini sayladı. Yusuf Peyğamberimiz kibi, biz de, siyasiy mabüsler apishaneni sayladıq. Biz patsifist ya da mazohist degilmiz. Qıymetlerimiz, imanımız, keleceknen bağlı fikirlerimiz şeytan insanlarnı qorquzğan apishaneden bizim içün daa qıymetlidir.
Qıymetlerimiz, imanımız, keleceknen bağlı fikirlerimiz şeytan insanlarnı qorquzğan apishaneden bizim içün daa qıymetlidir
Apishanede birlikniñ küçüni de kördim. Bu sözler Ukraina vaqtında pafosnen aytılğan adiy sözler degildir. Saña bilgili, samimiy advokatlar qoltutsa; tanımağan insanlarıñ, em de tek Qırımdan degil, bütün dünyadan saña mektüp yazsa; qayğırğan qardaşlarıñ bir şeyler yollasa; tanımağan, amma seni ve fikirlerini, qabaatsız olğanıñnı bilgen insanlarıñ mahkeme binaları ögüne kelse; qorantañna lâqaytsız insanlar qoltutsa, siyasiy mabüslerniñ balaları ise bütün qırımtatar halqınıñ balaları olsa. Birlik bu degilmi? Biri er kes, er kes de bir kişi içün bu degilmi? Bunıñ pek büyük emiyeti bar, inanıñız! Apiste yatqan bir çoq kişi biz, birligimizge samimiy şekilde suqlana!
Yüce Allahnıñ maña, yanımda oturğan qardaşlarıma bergenlerini ayrıca qayd etmek isteyim. Çalışmayıp, demir qapunıñ aşlığından qısmetimni alam. Kameramnı yarıqlatqan mektüplerni de andan ketireler. Mındaki dualarım daa evel olmağanı qadar kerçekleşe. Belki, Muhammed Peyğamberimizniñ hadisinden böyle ola: «Zulumğa oğrağannıñ duasından qorquñız – onıñ duası ve Allah arasında perde yoqtır!». Mında Allah ile bağıñ arta, ayrı yerine ketirile, dualar oqula, Quran oqula. Apishanede azatlıqta oqumağanım qadar kitap oqudım. Mında bir çoq meraqlı insannen tanıştım. Bir çoqu biznen – Kremlniñ mabüslerinen laf etip, ayat fikirlerini deñiştirdi.
Biñ kün uçıp ketti. Devamı ne? İleride bizni üküm ve daa bir etap, ayatımıznıñ yañı basamağı bekley. Bir şeyden peşman degilim, qayğılanmayım. Ümütsizlik yürekleriñizge keçmesin isteyim. Ayatıñızğa pozitiv baqıp, bizni qoruğan, qorçalağan, afu etken, doğru yolnı köstergen, bir çoq eyilik bergen, yardım etken, sevgen ve hayır bergen Allahqa işanıñız. «Allah bizge yete – O, pek yahşı Vekildir!»
Remzi Bekirov, vatandaş jurnalisti, aq qorçalayıcılar tarafından siyasiy mabüs dep tanıldı
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Malümat. Vatandaş jurnalisti, Aqmescitteki ekinci «Hizb ut-Tahrir davasınıñ» mabüsi Remzi Bekirov 2019 senesi martnıñ 27-nde apiske alındı. Onen beraber Qırımda 24 qırımtatar faali, hususan «Qırım birdemligi» cemaat birleşmesiniñ temsilcileri tutuldı. Olarnıñ evderinde FSB, Rusiye İç işler nazirligi ve Rosgvardiya tintüvler keçirdi. «Memorial» aq qorçalayıcı merkezi olarnı siyasiy mabüs dep tanıdı. 2021 senesi martnıñ 22-nde Rusiyeniñ Rostov-na-Donu Cenübiy okrugınıñ arbiy mahkemesi oturışuvında Remzi Bekirov devlet advokatlarından vazgeçkenini bildirdi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.