Qırımtatar rejissör Nariman Aliyev, "Evge" filminiñ aktörlarını nasıl saylağanı aqqında Qırım.Aqiqat Radiosı efirinde aytıp berdi
"Küçük oğulnın baş rolüni menim eki doğmuş qardaşım Remzi Bilâlov oynadı. Aktörlarnı saylağanda çoq şeyge baqa edim. Birinciden, Ukrainada qırımtatar aktörları az, ekinciden, olar olsa da - yazılğan qaramanğa kelişmeyler. Remzini türlü babalarnen baqqan edik, Ahtemni türlü oğullarnen baqa edik, amma beraberlikte olar güzel ve meraqlı körüneler. Bu tamam beraberlikte oynalacaq roller, babanı oğlundan ve oğulnı babasından ayırıp olamazsıñ. Olar beraberlikte çalışa ve film süjetini ilerilete", - tarif etti Nariman Aliyev.
Qırımtatar rejissör Nariman Aliyevniñ "Evge" filmi, oktâbr 24-ünde "Kinokolo" Ukraina kino tenqitçileriniñ milliy mükâfatını aldı.
Daa evel «Evge» filmi Odesa halqara kinofestivaliniñ Grand Prix mukâfatını aldı. «Evge» filminiñ ukrain premyerası Odesa kinofestivalinde iyülniñ 14-nde oldı. Levha noyabrniñ 7-nde Ukrainada kösterilecektir.
«Evge» levhası qırımtatarı Mustafa aqqında tarif ete. Eki oğlu Qırım işğalinden soñ Kyivge ketti. Büyük oğlu Nazim vefat ete, babası onı Qırımğa alıp, musulman ananelerine köre defin etmek ve küçük oğlu Alimni evge qaytarmaq içün paytahtqa yol ala.
Daa evel qırımtatar rejissöri Nariman Aliyevniñ «Evge» levhası Bükreşteki halqara kinofestivalinde eñ eyi film mukâfatını aldı.
Nariman Aliyev — qırımtatar rejissöri, «Qırım ikâyeleriniñ» (qısqa levha) müellifi. «Sensiz» filmi 66-ncı Berlin kinofestivaliniñ Generation 14+ çerçivesinde taqdim etilgen edi. Aliyev öz işlerinde qırımtatarlarnıñ qoranta munasebetlerini, anane ve turmuşını köstere.
