10-uncı Odesa halqara kinofestivali çerçivesinde qırımtatar asıllı ukrainalı rejissör Nariman Aliyevniñ «Evge» filminiñ premyerası olıp keçti. Qırım.Aqiqat mühbiriniñ bildirgenine köre, film, festivalniñ resmiy yarış programmasında iştirak ete.
Birinci seyirciler filmni 10 daqqalıq elçırpmalarnen «mukâfatladı».
«Evge» levhası qırımtatarı Mustafa aqqında tarif ete. Eki oğlu Qırım işğalinden soñ Kyivge ketti. Büyük oğlu Nazim vefat ete, babası onı Qırımğa alıp, musulman ananelerine köre defin etmek ve küçük oğlu Alimni evge qaytarmaq içün paytahtqa yol ala.
Filmniñ stsenariy müellifleri Nariman Aliyev ve ukrainalı rejissör, stsenarist Marısâ Nikitük oldılar. Prodüser – Vladimir Yatsenko. Onıñ bildirgenine köre, film dünyanıñ bir çoq memleketinde, şu cümleden Ukrainada kösterecekler.
Daa evel qırımtatar rejissöri Nariman Aliyevniñ «Evge» filmi Bükreşteki halqara kinofestivalinde eñ eyi film mukâfatını qazandı.
Nariman Aliyev — qırımtatar rejissöri, «Qırım ikâyeleriniñ» (qısqa levha) müellifi. «Sensiz» filmi 66-ncı Berlin kinofestivaliniñ Generation 14+ çerçivesinde taqdim etilgen edi. Aliyev öz işlerinde qırımtatarlarnıñ qoranta munasebetlerini, anane ve turmuşını köstere.
