Ukraina baş naziriniñ muavini, Ukrainanıñ vaqtınca işğal etilgen topraqlarınıñ reintegratsiya meseleleri naziri Oleksiy Reznikov Litvaniya Tış işler naziri Gabrielüs Landsbergis ile Qırımnıñ işğalden azat etilüvini ve “Qırım platforması”nı muzakere etti. Bunı Reintegratsiya nazirliginiñ matbuat hızmeti haber ete.
Oleksiy Reznikov Litvaniya TİN başına “Keçüv devriniñ devlet siyaseti aqqındaki” Ukraina qanun leyhasınıñ esas printsipleri aqqında aytıp berdi.
“Eñ esası, Qırımnıñ ve Donetsk ve Lugansk vilâyetleriniñ ayrı bölgeleri işğalden azat etilgen soñ biz bir devlet olaraq ne ve nasıl yapmaq kerek olğanımız aqqında milliy dilognı başladıq. Elbette ki, saylavlar, amnistiya ve mesüliyet, birleştirme meseleleri ve digerleri ayrı bir qanunen çezilmeli”, – dedi Reznikov.
Onıñ bildirgenine köre, qanun leyhasınıñ ilk metini 160 respondentke, şu cümleden türlü memleketlerniñ elçiliklerini yollanğan.
Bundan ğayrı Oleksiy Reznikov Litvaniyanıñ “Qırım platforması”nda faal iştirak etmesine ümüt etkenini bildirgen.
Ukraina Tış işler naziri Dmıtro Kuleba ve Litvaniya zenaatdaşı Gabrielius Landsbergis fevralniñ 23-nde Kyivdeki matbuat konferentsiyasında Vilnüs ve Kyiv «Qırım platformasını» ve Rusiyege qarşı sanktsiyalarnı uzatuv imkânlarını muzakere ettiler.
Ukrainanıñ Çeh Cumhuriyeti elçisi Yevğen Perebiynis, Ukraina akimiyetiniñ teşebbüsinen Qırımnı işğalden qurtaruv halqara meydançığınıñ quruluvı «dünyağa Avropanıñ merkezinde topraqnıñ bir qısmı işğal etilgenini» hatırlatacaq, dep qayd etti.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 21-nde olacaq, dep bildirgen edi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
