Qırım sakinleri bütün memlekette qısmiy seferberlik ilân etilgen soñ Rusiyeni terk etmege tırışqanda qıyınlıqlarnen qarşılaşalar. RF sıñırlarında vaziyet deşetlidir. Bunıñ aqqında Qırımtatar Milliy Meclisiniñ reisi Refat Çubarov Facebook saifesinde yazdı.
"Eñ felâketli vaziyet Rusiye-Gürcistan sıñırındadır. Anda Gürcistan tarafı Ukrayina vatandaşlarına - işğal etilgen Qırım sakinlerine formal uyğunsızlıqlar esasında Gürcistanğa kirmek izin bermeyler. Rusiye-Gürcistan sıñırında Qırımdan kelgen onlarnen aile keçmek içün bekley, olarnıñ ekseriyetiniñ kiçik balaları bar", - dedi o.
Onıñ sözlerine köre, Rusiye-Qazahistan sıñırında rusiye tarafında pek çoq para alalar (bir maşna içün 2 biñden ziyade ABD dolları). 18 yaşına yetmegen balalarınen aileler gece-kündüz arabalarından keçireler.
Meclis reisi, qırımlılar Avropa Birligi memleketelrine kirmek tırışqanda da bir çoq qıyınlıqlarnen qarşılaşqanlarını bildirdi.
"Letoniya, Litvaniya, Poloniyanıñ köç hızmetleri tarafından Ukrayina vatandaşlarınıñ - vaqtınca işğal etilgen Qırımnıñ sakinleriniñ vesiqalarına talaplar da daa ciddiy oldı. Mezkür ülkelerniñ topraqlarına kirmege izin alamağan Ukrayina vatandaşları - Qırım sakinleriniñ sayısı er bir saat arta. Belarus ve RF taraflarından Poloniya, Letoniya, Litvaniya ve Estoniyanıñ sıñırlarında deşetli insan faciaları ola. Poloniya sıñırcıları tarafından Poloniyanıñ topraqlarıa yiberilmegen ve rusiyege (Kaliningrad) keri qaytarılğan qırımtatar aileleriniñ biriniñ yetişken azalarını Rusiye FSB-si tarfından terrorcılıqnen qabaatlanıp tefqif etildiler", – dep qayd etti Çubarov.
Çubarov, Ukrayina ukümeti ve Ukrayina vatandaşları - Qırım sakinleriniñ ketken devletlerniñ Ükümetleri seviyesinde acele ortaq qararlar bermege çağırdı.
Sentâbrniñ 21-nde Rusiyede ilân etilgen qısmiy seferberlik sebebinden Qırım ve Aqyarnıñ Rusiye akimiyeti askerlikke aluv komissiyalarını quruv aqqında bildirdi. Sergey Aksenov esas Ukrayınağa 1200 «göñüllini» yolladı ve daa eki batalyon azırlay, dep bildirdi.
Qırımdaki Rusiye kütleviy haber vastaları «añlaşmalı arbiy hızmetniñ» reklamasını yapa.
İşğal etilgen Qırımnıñ tahminen 5000 sakini Rusiye prezidenti ilân etken qısmiy seferberlikten soñ arbiy komissarlıqqa celpname aldı.
Daa evel berilgen malümatqa köre, Qırım ve Aqyarda Rusiyeniñ Ukrayınağa qarşı cenkinde ölgen Rusiye arbiylerini defin etmege devam eteler.
Ukrayına prokuraturasınıñ malümatına köre, 2015 senesinden başlap Rusiye Qırımda Rusiye Federatsiyasınıñ silâlı quvetlerine askerlikke aluv qanunsız kampaniyasını 15 kere keçirdi. Aq qorçalayıcılar Qırım ve Aqyar sakinleriniñ Rusiye ordusına aluvını halqara uquq bozuluvı dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
