Rusiye prokuraturası «qırımlı musulmanlar davasınıñ» mabüsi, imam Raif Fevziyevni 17 yılğa azatlıqtan marum etmege talap etti, dep haber ete «Qırım birdemligi» cemaat birleşmesi.
«Prokuror munaqaşalarda mabüs Raif Fevziyevniñ qabaatı isbatlandı dep tüşüngenini ayttı. O, mahkemeden 17 yıl sert rejimli koloniyada qalmasını, ilk 3 yılnı apishanede keçirmesini, esas müddeti bitken soñ ise daa 2 yılğa areket sıñırlanmasını rica etti», – dep aytıla haberde.
«Qırım birdemligi» haberine köre, nevbetteki diñlevler 2023 senesi yanvarniñ 11-ne belgilendi.
Bundan evel Rostov-na-Donu Rusiye Cenübiy okrugınıñ arbiy mahkemesi «qırımlı musulmanlar davasınıñ» mabüsi Raif Fevziyevniñ apis müddetini 2023 senesi yanvarniñ 23-ne qadar uzattı.
İyün ayında Raif Fevziyevniñ advokatı Edem Semedlâyev bildirgenine köre, Rusiye apsinde müvekkiliniñ sağlıq vaziyeti fenalaştı ve bir sıra hastalıq peyda oldı.
Daa evel berilgen malümatqa köre, Rusiye FSBsi 2021 senesi avgust ayında tutulğan aralarında Raif Fevziyev de olğan beş qırımtatarı ve musulmanğa qarşı «akimiyetni zorbalıqnen zapt etkenine azırlıq» yañı cinaiy davasını açtı.
2021 senesi avgust ayında Rusiye quvetçileri Qırımda birden beş qırımtatarınıñ evini tintti. Soñra faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyev tutuldı.
Raif Fevziyev ve Cebbar Bekirov Rusiye Ceza kodeksiniñ 205.5 maddesiniñ 1-inci qısmına istinaden (Terror teşkilâtınıñ faaliyetini teşkil etüv), qalğanları ise Rusiye Ceza kodeksiniñ 205.5 maddesiniñ 2-nci qısmına istinaden (Terror teşkilâtınıñ faaliyetinde iştirak etüv) şübheli ola. Avgustnıñ 17-nde ve 18-nde Rusiye qadıları tutulğanlarnı nezaret altına aldı. Tutulğanlar ya da advokatları yañı qabaatlavlarnı tefsir etmey.
Qırım Muhtar Cumhuriyeti ve Aqyar prokuraturası qırımtatarlarnıñ evlerinde keçirilgen yañı tintüvler ve tutuvlarnen bağlı cinaiy tahqiqat açılğanını bildirgen edi.
Ukraina prezidenti Volodımır Zelenskıy Rusiye quvetçileri keçirgen tintüvlerni ve qırımtatarlarnıñ tutuluvını «adden aşır bir insan aqları bozuluvı» dep adlandırdı, Ukraina Tış işler nazirligi ise Rusiyege qarşı narazılıq bildirdi.
Ukraina Yuqarı Radasınıñ insan aqları vekâletlisi Lüdmila Denisova dünyanı qırımtatarlarnıñ Rusiye tarafından taqip etilüvine cevap bermesine çağırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
