Link açıqlığı

Saatnıñ esas haberi

Qırımtatar Milliy Meclisiniñ azaları Ukraina RNBO yolbaşçısınen Qırımnı işğalden qurtaruv strategiyasını muzakere etti – Çubarov


Dekabrniñ 30-nda Qırımtatar Milliy Meclisiniñ Kyivdeki ofisinde Ukraina milliy telükesizlik ve mudafaa şurasınıñ kâtibi Oleksiy Danılov ile körüşüv ötkerildi. Subet vaqtında Ukrainanıñ Qırımnı işğalden qurtaruv strategiyası muzakere etildi. Bu aqta Meclis reisi Refat Çubarov bildirdi.

«Tafsilâtlı ve açıq subette körüşüv iştirakçileri vaqtınca işğal etilgen Qırım Muhtar Cumhuriyeti ve Aqyar şeerini işğalden qurtaruv ve reintegratsiya devlet strategiyasını muzakere etkende ve azırlağanda, «Qırım platforması» teşebbüsini kerçekleştirgende işbirligi meselelerini ve qanunsız faaliyeti Qırımda Rusiye işğalci akimiyetine ve yarımadada yaşağan Ukraina vatandaşlarına qarşı sert taqip ve repressiyalarnıñ quvetleştirilüvine yardım etken şahıs ve müessiselerge qarşı sanktsiyalarnıñ qullanıluvını muzakere etti», – dep tarif etti Çubarov.

Onıñ malümatına köre, körüşüv soñunda taraflar Qırımtatar Milliy Meclisiniñ Milliy telükesizlik ve mudafaa şurası ile muzakere etilgen meselelerde belli işbirligi şekilleri aqqında añlaştı.

Ukraina Tış işler naziri Dmıtro Kuleba intervyü berip, Qırımnı işğalden qurtaruv meselesi yarımadanı işğal etken Rusiye içün «ceennem» olmalı, dep ayttı.

Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.

2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.

Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.

Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.

2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.

Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.

Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.

XS
SM
MD
LG