Qırım yahşı haberlerni dört köznen beklep, özüni izolâtsiya etüv rejimine döndi, lâkin olar tek muğayta. Adamlar yedeklerini aşap bitire, ket-kete kelecek içün daa çoq qorqa. Ve bu vaqıtta "Yekâne Rusiye"niñ Qırım vekilleri qırımlılarnıñ ağır alında özlerine PR yapa.
Yañı koronavirus infektsiyası yayılmasınıñ ögüni aluvı boyunca operativ ştabnıñ er künlük toplaşuvlarında "Yekâne Rusiye" firqasınıñ Qırım başı Vladimir Konstantinov "Yekâne Rusiye" mebusları tarafından qırımlılarğa yardım aqqında aytqance, ekrannıñ o bir tarafındaki adamlar ökünçlü baqa. Ya "yemlik"niñ başında olğan bu mebuslar, özüni izolâtsiya etken qırımlılarğa yalıñız bir zerre qadar para ayırğanda, daa nasıl özüni tutsın. Misal içün, bir mebus - Qırımdaki eñ büyük et emalı müessisesiniñ saibi, "Yekâne Rusiye" mebusları yaratqan volontör merkezine 100 paket sosiska ayırdı. Bu qadar "cümertlikten" özü utanmaymı? Resmiy malümatqa köre, Qırım ükümetiniñ mebusları soñki altı yılnıñ içinde bes kere bayca oldı.
Dünya burhanı ve energiya ammallarınıñ ucuzlanması şaraitinde vaziyetni köz etkende, koronavirus ştabınıñ toplaşuvında Sergey Aksönov Dmitriy Medvedevniñ: "Para yoq, amma siz sabır etiñiz" meşur ifadesini tekrarlaycaq vaqtını sadece tekaran beklemege qalğanı añlaşıla. Ya karantinnen beraber qazançları toqtağan, amma masrafları toqtamağan qırımlılar ne yapsın?
Bazıları dayanmayıp çıqıp çalışa, amma politsiya patrulerine rastkele. Ümütsizlik ve açuv adamlarnıñ aqılsız şeyler yapmasına sebep ola, misal içün aprelniñ 16-sında Aqmescitte Puşkin soqağında qanunğa qarşı çıqıp bazar etken qadın yapqanı kibi. Politsiya yanına kelip protokol tizecek edi, qadın ise olarnı tayaqnen urdı. Endi 10 yılğace apis cezası ola bile.
Adamlarnıñ aqçası qalmağanını, erzaq tükânlarında satuvlarnıñ 30%-ğa eksilmesi de köstere. Tükânlar ajiotaj beklep bayağı mal alıp qoydı, şimdi ise tez bozulğan erzaqlarnı satmaq içün aktsiya yapmalılar. Qırımda orta sınıf o qadar çoq olmağanını köz ögüne almadılar, adamlarnıñ ekseriyeti aylıqtan aylıqqace yaşay, onıñ içün mahsulatnı alıp qoymağa çareleri yoq. Bundan da ğayrı, qorantalarnıñ çoqusı aqçalarını karantinniñ daa ilk aftasında içip bitirdiler.
Aqmescitte kirağa alğanlar azlaştı. Gençler ve yaş qorantalar kira meskeninden vazgeçip, ana-babalarınıñ evlerine qayta. Saiplerniñ çoqusı kiracılarını tutmaq içün kira fiyatını tüşürmeli.
Sadece adiy qırımlılar degil sıqınalar. Küçük ve orta biznes de ağır alda. Akimiyet er kesni mecburiy raatlıq künlerine yolladı, amma işçileriniñ aqlarını tölemege buyurdı. Devlet yardımı olaraq aylıq bermesine imtiyaz kreditlerni teklif ettiler. Tanış böyle kreditni almağa istegenini ayttı, amma o qolay degil eken! Ondan pey bermesini ve kefil olmasını istediler. Ebet, o aylanıp böyle "hayırperverlerden" tez qaçtı.
Ve bu sadece burhannıñ başı. Amma er şeyniñ bir hayırı bar. Eñ azından, qırımlılarnıñ çoqusı közlerini açıp, qayda tüşkenlerini añlar. Ğaliba, deñişmeler uzaq degil...
Zarema Seitablayeva, qırımlı, bloger (müellifniñ adı ve soyadı telükesizlik maqsadınen deñiştirildi)
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
