Qırımda "devlet hainliginen" qabaatlanğan İvan Yatskin Rusiyeniñ Kemerovo vilâyetindeki Belov şeeriniñ 44-nci cezahanesine etap etildi. Bunı advokat Nikolay Polozov Facebook saifesinde haber etti.
Advokatnıñ bildirgenine köre, Yatskin birden basqılarğa oğratılıp başlağan ve "qaçmağa avesi" olğan bir kişi olaraq profilaktik esapqa alınğan.
"İvan Yatskin Kemerovo vilâyetindeki Belov şeeriniñ 44-nci cezahanesinde bulunğanı bugün belli oldı. Malüm olğanı kibi, anda, o, sistematik tarzda tazyıqqa oğratıla. O artıq "qaçmağa avesi" olğan bir kişi olaraq profilaktik esapqa alğanlar ve bu Ukraina vatandaşlığı olğanı içün", - dep yazdı Polozov.
Polozovnıñ qayd etkenine köre, Yatskin "ukrain milletine ait olğanı ve Ukraina vatandaşlığı olğanı içün insan menligini aqaletlegen munasebetke oğratılğan ve tehdit etilgen".
Bundan ğayrı, mahküm etilgen ukrainniñ tam tibbiy baqınuvğa ihtiyacı bar.
Evel Nikolay Polozov İvan İyatskinniñ "ayaqları çürüy", dep bildirgen edi.
Mayısnıñ 21-nde Rusiye nezaretinde olğan Qırımnıñ Yuqarı mahkemesi «devlet hainliginen» qabaatlanğan Qırım sakini İvan Yatskinge üküm çıqardı. Alla Hineviçniñ reisliginde qadılar kollegiyası İvan Yatskinni bir yıl sıñırlav ile 11 yıl sert apis cezasına mahküm etti.
Ukraina TİN dünya toplulığını İvan Yatskinge çıqarılğan ükümge cevap bermesine çağırdılar.
Ukraina Yuqarı Radasınıñ insan aqları vekâletlisi Lüdmila Denisova «devlet hainliginen» qabaatlanğan İvan Yatskinniñ ukmüni takbih etti.
Yatskin «devlet hainliginen» qabaatlandı (Rusiye ceza qanunnamesiniñ 275 maddesi – QA). Bu dava boyunca bütün mahkeme oturışları qapalı keçirildi, mahkeme, dava materiallarında devlet sırı olğanına atfı ete edi.
Qırımnıñ Curçı rayonınıñ Aybar (Voykovo) köyüniñ sakini İvan Yatskin 2019 yılda oktâbr 16-sında tutuldı. Bu dekabr ayında belli oldı.
Rusiye tahqiqatı, Yatskin Qırımda olıp, UMT ile işbirlik yaptı ve «Rusiyeniñ devlet sırı» olğan malümatnı olarğa bildirdi, dep ayta.
Qırım.Aqiqatnıñ Ukraina telükesizlik hızmetine yollağan muracaat cevabında İvan Yatskin UTH ile işbirligi yapmadı, dep aytıla.
«Memorial» aq qorçalayıcı merkezi İvan Yatskinni siyasiy mabüs dep tanıdı.