Qırımda qırımlı kollaborantlar arasında çatışmalı vaziyet kerginleşmekte. Rusiye tarafdarı faal ve bloger Eyvaz Ümerov Qırımdaki kollaborantlar, şu cümleden Rusiyeniñ Qırımdaki yüksek rutbeli şahısları içün hoş kelmez malümatnı aşkâr etip, yayınlanğan malümatnı cevap berilmesi içün Moskvağa muvafıq organlarğa yollay.
Eyvaz Ümerov açıq ilân etti ki, "Qırımda açıq -aşkâr duşman elementleri akimiyettediler". Rusiyeniñ Qırım yolbaşçısınıñ mesleatçısı Ervin Musayev ile gürültilü çatışma sebebinden, beden yaraları ketirmekte şübeli sayılğan Eyvaz Ümerov eki künlük tevqiften soñ ketmemezlik senetini alıp azat etildi.
Bundan soñ rusiye tarafdarı faal siyasiy muhaliflerini kene tehdit etip, artıq küç qullanmazdan areket etecegini bildirdi.
"Ne, gizli kardinallar ve sessiz insanlar, beklemediñizmi? İşte mındam, azırlanıñız, evel insancasına sizni acıy edim, aqlıñız kelir, dep tüşüne edim. Amma artıq men "pek küçlü" ve yalıñız RF qanunları çerçivesinde uracağım", - dep yazdı Ümerov içtimaiy ağlardaki saifesinde.
VKontakte içtimaiy ağında Qırımıñ Rusiye yolbaşçısı Sergey Aksönovnıñ saifesinde yazılarınıñ altında ekseriyeti qırımtatar olmağan Eyvaz Ümerovnıñ tarafdarları faal şekilde Aksönovnı Ümerovnıñ mesleatçısı Ervin Musayev ile çatışmasına cevap bermesine çağıralar.
Uquq qoruyıcı ve advokat Nikolay Polozovnıñ fikrince, Qırımnıñ rusiye yolbaşçısı bu vaziyetke açıq şekilde cevap bermeycek. Amma aynı zamanda, Aksönov bu çatışmanı hulâsasız qaldırmaz, dep saya advokat.
Akönovnıñ etrafından yüz bergen kiçik adiselerge cevap bermekten daa ziyade aktual işleri barNikolay Polozov
"Aksönov mesleatçısınıñ dögülmesine açıq şekilde cevap bermeycek. Körünip tura ki, işğalciler arasında peyda olğan telâş şaraitinde Akönovnıñ etrafından yüz bergen kiçik adiselerge cevap bermekten daa ziyade aktual işleri bar. Ananeviy bürokratik taktikanı qullanmağa qarar alğandır, deyler qoluñ sınsa yeñiñ içinde qalsın, işte bu. Elbette öz arasında bir de bir iş keçirilir. Amma açıq şekilde cevap beklemez edim", - dep yasa advokat.
Aynı zamanda, Eyvaz Ümerov rusiye tarafdarı qırımtatar kollaborantlarını tenqit etmege ve Kıyivge riayetkârlıqta qabaatalmağa devam ete. Qırım müftisi Emirali Ablayevniñ tam susması, Milletlerara meseleleri komitetiniñ reberi Ayder Tippanıñ areketsizligi vaziyetinde Ukrayina Malümat ve psihologik ameliyat merkezleri (uydurma - QA)Qırım Cumhuriyetinde sebatnen qırımtatar meselesini ve milletlerara munasebetlerni bozmağa tırışalar, dep bildire. O, onıñ tenqit etken şahıslar artıq "cumhuriyet reberleriniñ etrafında aylanıp", onıñ "tevqif etilmesini" talap etkenlerini qayd ete.
İşğalden soñra Qırımğa köçip kelgen rusiyeli bloger Aleksandr Gornıy da Rusiyeniñ Qırım milletlerara devlet komitetiniñ faaliyetiniñ sualler doğurğanını qayd ete.
"Milletlerara meseleleri devlet komiteti bellei bir gruppanıñ menfaatlarını ileriletken ğayet hucur bir organdır. Onı ya da qapatmaq, ya da acele yañıdan teşkil etmek kerek. Reberligini er eki yıl deñiştirmek kerek. Reber ise türlü milletlerden olmalı. Ve bu organ, daa doğrusı onıñ azaları çetel tesir altında olğanlarını tahmine etem. Bu Türkiye, bazı Ukrayina vatandaşları. Mında bunıñ içün çetel agenti statusını da almaq mümkün", - dep yaza o öz saifesinde.
Halqara uquq eksperti Boris Babinniñ fikrince, bu vaziyet qırımlı kollaborantlar arasında akimiyet oğrunda küreşniñ kerginleşmesi demektir.
Bunıñ içün Musayev ve Ümerov arasındaki munaqaşa bir şey deñiştirmezBoris Babin
"Artıq bir qaç yıldır ki işğalciler bir de bir qırımtatar kollaborantını muvafıq mesele ile bağlı "yolbaşçı" vazifesine "tayin etmek" niyetinde olmağanı körünip tura. Çünki kerçekten olar iç bir qırımtatarğa işanmaylar. Bu sebepten tecavuzcı tarafından tayin etilgen bütün qırımtatar "yolbaşçıları", "mesleatçıları", "medeniy muhtariyetlerniñ reberleri" bu sadece rusiye mahsus hızmetleriniñ agenturasıdır. Bunıñ içün Musayev ve Ümerov arasındaki munaqaşa bir şey deñiştirmez ve yarımada işğalden azat etilgenine qadar olar evelden belgilengen vazifelerini eda etecekler", - dedi Babin.
Rusiye akimiyeti qırımtatarlarğa işanmağanını qırımlı advokat ve uquq qoruyıcı Emil Kurbedinov da dey.
"Men qırımtatar olaraq qırımtatarlar Qırımda Rusiye akimiyeti, şu cümleden quvetçileri tarafından işançsız qatlam kibi tanılğanını tamamınen is etem", - dedi Kurbedinov.
Rusiye ordusınıñ Ukrayinağa qarşı büyük istilâsınıñ başlamasından soñ Qırımda qırımtatarlarğa qarşı munasebet daa ziyade kerginleşti. Rusiye tarafdarı blogerler qırımtatarlarnı Kıyiv ve Meclisni desteklemekte qabaatlap, bu vaziyetni daa zide kerginleştire.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
