Kreml kontrolindeki Qırım Yuqarı mahkemesi mahkeme tarafından cuma namazını qıldırğanı içün para cezasınen cezalandırılğan imam Dilâver Halilovnıñ ükmüne qarşı advokatnıñ istinaf şikâyetini red etti. Bu aqta imamnıñ imayecisi Emil Kurbedinov «Qırım birdemligine» bildirdi.
«Qarar endi azır olsa, ne kerek edi toplaşmağa? Bugün akimiyet imamlarnı taqip etip, qayda ketkenini daa bir kere isbatlay. Akimiyetniñ sebepsiz talaplarını yerine ketirmege istemegen imamlar böyle mahkeme davaları vastasınen taqip etile», – dep ayttı Kurbedinov.
2020 senesi aprelniñ 29-nda Rusiye kontrolindeki İçki rayonı mahkemesiniñ qadısı İgor Bajnik imam Dilâver Halilovnı Rusiye Memuriy cinayetler kodeksiniñ 20.2 maddesiniñ 2-nci qısmına istinaden («Cemaat nizamınıñ bozuluvına sebep olğan vatandaşlarnıñ bir yerde bulunması ve (ya da) areket etmesi») qabaatlı tanıp, cuma namazını qıldırğanı içün 30 biñ ruble para cezasını berdi.
Protokol tizgen Rusiye politsiyasınıñ hadimleri namaz sport kompleksi binasında qılındı, dep izaatladı, bu bina daa 16 yıl evelsi rayon belediyesi tarafından qasaba musulmanlarına berildi. Bu vaqıtqa qadar din cemiyeti Ukraina vesiqalarınen çalışqan edi.
Advokat Emil Kurbedinov mahkeme qararına qarşı istinaf şikâyetini berdi.
Bunıñ ögüne imam Dlâver Halilov malümat bermesi ve Rusiye Memuriy cinayetler kodeksiniñ 5.26 maddesiniñ 4-ünci qısmına istinaden (qanunsız missionerlik faaliyeti) memuriy cinayet qararını teslim alması içün Qırımnıñ İçki rayonı Rusiye prokuraturasına davet etilgen edi.
İmam Dilâver Halilov Rusiye kontrolindeki Qırım musulmanları diniy idaresi ştatında yoq.
Bundan evet Qırımnıñ Rusiye prokuraturası aqmescitli imam Rasim Dervişevge qarşı memuriy dava açtı. Qararğa binaen, cuma vaazı ve namaz uquq bozuluvı oldı. Rusiye kontrolindeki Aqmescitniñ Mirovoy mahkemesi imam Rasim Dervişevni«qanunsız missionerlik faaliyetinde» qabaatlap, 5 biñ ruble para cezasını berdi.
