Rusiye kontrolindeki Sudaq şeer mahkemesi bazarertesi künü, aprelniñ 12-nde, «Veciye Kaşka davasınıñ» mabüsi Kazim Ametovnıñ mahkümiyetini bağışlap, şartlı apis cezasını lâğu etti. Bu aqta «Qırım birdemligi» cemaat birleşmesi qırımtatar milliy areketi veteranınıñ advokatı Emil Kurbedinovnıñ aytqanlarına esaslanıp bildirdi.
İmayeci, mahkemege muracaat etip, Ametov «sınav müddeti vaqtında yañlış bir şey yapmadı, yaşağan yerine müsbet taraftan tasvir etile» ve şartlı ceza nizamına riayet ete, dep qayd etti.
«Prokuror, Qırım Cumhuriyeti ve Aqyardaki Rusiyeniñ Cezalarnı yerine ketirüv federal hızmetiniñ vekili muracaatqa qarşı çıqmadılar, şunıñ içün qadı Yevgeniy Rıkov onı qanaatlendirdi, mabüsniñ cezasından yarısı çoq keçti, özüni yahşı taraftan kösterdi ve tutuv şartlarını bozmadı, dep ayttı», – dep yaza «Qırım birdemligi».
2020 senesi dekabrniñ 4-nde «Veciye Kaşka davasınıñ» 63 yaşında mabüsi Kazim Ametovnıñ evinde Rusiye quvetçileri tintüv keçirdi. İlk malümatqa köre, anda «tahqiqat tedbirleri» oldı. Qırımtatar milliy areketiniñ faali Nariman Celâl bildirgenine köre, FSB hadimleriniñ tintüvi Ametovnıñ oğlunen bağlı.
Oña efsane dey ediler. Veciye Kaşkasız üç yıl (fotoresimler)
Ametov, evlerinde keçirilgen tintüv tafsilâtları aqqında tarif etti.
Qırım Muhtar Cumhuriyeti ve Aqyar prokuraturası ve Qırım Muhtar Cumhuriyetiniñ Milliy politsiyası cinaiy tahqiqat başlattı.
«Veciye Kaşka davası»
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
2019 senesi aprelniñ 7-nde Rusiye kontrolindeki Aqmescitniñ Kiyev rayon mahkemesi para talap etüvde qabaatlanğan «Veciye Kaşka davasınıñ» mabüslerine üküm çıqardı. Ruslan Trubaç, Bekir Degermenci ve Kazim Ametov 3 yılğa şartlı olaraq üküm etildi, 3 yıl sınav müddeti olaraq belgilendi. Asan Çapuh 3,5 yıl şartlı apis cezasını aldı, 3 yıl sınav müddeti olaraq belgilendi.
Bekir Degermenci, Asan Çapuh, Kazim Ametov ve Ruslan Trubaç qabaatlarını tanımadı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.