Kazim Ametov «Veciye Kaşka davasınıñ» mabüsi ola
«Veciye Kaşka davasınıñ» mabüsi olğan 63 yaşında sudaqlı qırımtatar faali Kazim Ametovnıñ evinde tintüv keçirildi. İlk malümatqa köre, anda «tahqiqat tedbirleri» oldı, dep bildire «Qırım birdemligi».
«Sudaq rayonınıñ Suvuq Sala kirişinde Rosgvardiya maşinası tura edi. Ametovlarnıñ evi yanında quvet qurulışlarınıñ hadimleri tolu mikroavtobus tura edi. Tintüv 7:30-da başlap, 8:35-te bitti. Aqmescitniñ Kiyev rayon mahkemesi qarar çıqardı», – dep bildire faaller.
Başqa malümat şimdilik yoq.
Rusiye quvet qurulışları izaat bermey. Qırım.Aqiqat tafsilâtlı malümat almağa tırışa.
Noyabr ayında Rusiye kontrolindeki Aqmescitniñ Jeleznodorojnıy rayon mahkemesi Kazim Ametovnıñ davasını baqıp başladı. O, Bağçasaraydaki vaqtınca tutuv izolâtorı ve Aqmescitniñ №1 SİZOsında apiste tutuv şaraitleri «insan itibarını aşalağanı» içün dava açmağa talap etti. 63 yaşında Ametov «Veciye Kaşka davası» çerçivesinde 2017 senesi noyabrniñ 23-nden 2019 senesi yanvarniñ 24-ne qadar apiste yattı.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
2019 senesi aprelniñ 7-nde Rusiye kontrolindeki Aqmescitniñ Kiyev rayon mahkemesi para talap etüvde qabaatlanğan «Veciye Kaşka davasınıñ» mabüslerine üküm çıqardı. Ruslan Trubaç, Bekir Degermenci ve Kazim Ametov 3 yılğa şartlı olaraq üküm etildi, 3 yıl sınav müddeti olaraq belgilendi. Asan Çapuh 3,5 yıl şartlı apis cezasını aldı, 3 yıl sınav müddeti olaraq belgilendi.
Bekir Degermenci, Asan Çapuh, Kazim Ametov ve Ruslan Trubaç qabaatlarını tanımadı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
