Rusiye kontrolindeki Qırım Yuqarı mahkemesi, Noman Çelebicihan «qırımtatar batalyonında» iştirak etkeninden şübheli sayılğan Aqmeçit rayonınıñ sakini Nariman Mejmedinovnı apiste qaldırdı. Bu aqta «Qırım birdemligi» cemaat birleşmesi haber ete.
Mahkeme oturışuvı videokonferentsiya vastasınen qapalı rejimde keçirildi.
Hatırlatamız, 2020 senesi fevralniñ 4-nde Aqmescitniñ Kiyev rayon mahkemesi Aqmeçit rayonınıñ 55 yaşında sakini Nariman Mejmedinovnı apiske aldı. Onıñ tutuluvı aqqında fevralniñ 17-nde belli oldı.
Tahqiqat versiyasına köre, qırımtatarı 2016 senesi yazda Ukrainağa ketip, «Çelebicihan qırımtatar göñülli batalyonına» kirdi.
FSB malümatına köre, er adamğa qarşı Rusiye Ceza kodeksiniñ 208 maddesiniñ 2-nci qısmına (silâlı birleşmede iştirak etüv – QA) istinaden cinaiy dava açıldı.
«Asker» cemaat teşkilâtınıñ reisi Lenur İslâmovnıñ bildirgenine köre, Noman Çelebicihan «qırımtatar batalyonında» Qırımda Rusiye quvetçileri tarafından tutulıp apiske alınğan Aqmeçit rayonınıñ sakinini tanımaylar.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
