«Asker» cemaat teşkilâtınıñ reisi Lenur İslâmovnıñ bildirgenine köre, Noman Çelebicihan «qırımtatar batalyonında» Qırımda Rusiye quvetçileri tarafından tutulıp apiske alınğan Aqmeçit rayonınıñ sakinini tanımaylar. Bunı o, Qırım.Aqiqatqa bildirdi.
«Kim olğanını bilmeyim. Anda aytqanlarına köre, 61 yaşında. Bizde 60 yaştan büyük insanlar yoq edi ve olamaz. Bunı tasavvur etip olamayım. Putin daa bir deñişim fondunı şekillendire. Birilerini azat ete, digerlerini tuta. Bu aqta Mustafa Cemilev (qırımtatarlarnıñ milliy lideri, Ukraina Yuqarı Radasınıñ deputatı – QA), Refat Çubarov (Qırımtatar Milliy Meclisiniñ reisi – QA) aytqan ediler. Er kes bunı ayttı. Putinnen añlaşma tizmege olmay. Birileri apiske alınsa – biznen bağlı bir haber degil. Ne içün apiske alalar? Ya «Hizb ut-Tahrir» – «terror teşkilâtı», ya da Ukraina qanunlarına köre vatandaş birleşmesi esasında qurulğan batalyon sebebinden – bu bir zıncırnıñ buğumları», – dedi İslâmov.
Onıñ aytqanına köre, işğal etilgen topraqlarnı azat etmege azır olğanını aytqan er kes Rusiye akimiyeti içün duşman ola.
«Buña baqıp istegen er kesni apiske alacaqlar. Bunı ne içün yapalar? İleride prezidentke (Ukraina prezidenti Volodımır Zelenskıyge – QA), bizge, daa yımşaq olayıq dep, basqı yapmaq içün», – dep qayd etti İslâmov.
Onıñ bildirgenine köre, Qırımda tutulğan kişini tanımay, amma «pek yazıqsına». İslâmov, yarımadada FSB qabaatlavlarından ve tutuvından kimse imaye etilemez, dep tüşüne.
Rusiye FSBsi fevralniñ 17-nde işğal etilgen Qırımda «N.Çelebicihan qanunsız silâlı batalyonında iştirak etkeninden» şübheli sayılğan Aqmeçit rayonınıñ sakinini tuttı, dep bildire. Rusiye mahsus hızmeti, şübheli kişi 2016 senesi yazda Ukrainağa ketip, mezkür batalyon saflarına kirdi, dep israr ete.
FSB malümatına köre, er adamğa qarşı Rusiye Ceza kodeksiniñ 208-inci maddesiniñ 2-nci qısmına istinaden (silâlı birleşmede iştirak etüv – QA) cinaiy dava açıldı.
Qırımtatar faalleriniñ malümatına köre, tutulğan kişiniñ adı – Nariman Nejmudinov.
2019 senesi yanvar ayında Rusiye kontrolindeki Qırımnıñ Yedi Quyu rayon mahkemesi 24 yaşında Qırım sakini Fevzi Sagancini «Ukrainada qanunsız silâlı birleşmede iştirak etkeninde» qabaatlap üküm çıqardı.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
