Link açıqlığı

Saatnıñ esas haberi

FSB, «qanunsız silâlı batalyonda» iştirak etkeninden şübheli sayılğan qırımlını tuttı, dep bildire


Rusiye FSBsiniñ hadimleri işğal etilgen Qırımda «N.Çelebicihan qanunsız silâlı batalyonında iştirak etkeninden» şübheli sayılğan Aqmeçit rayonınıñ sakinini tuttı, dep bildire. Bu malümatnı bazarertesi künü, fevralniñ 17-nde, Qırım ve Rusiye kütleviy haber vastalarına Rusiye müessisesiniñ matbuat hızmeti bildirdi.

Rusiye mahsus hızmeti, şübheli kişi 2016 senesi yazda Ukrainağa ketip, mezkür batalyon saflarına kirdi, dep israr ete.

FSB malümatına köre, er adamğa qarşı Rusiye Ceza kodeksiniñ 208-inci maddesiniñ 2-nci qısmına istinaden (silâlı birleşmede iştirak etüv – QA) cinaiy dava açıldı.

«Al-azırda şübheli kişi yaqalandı. Mahkeme qararınen oña sıñırlav tedbirini saylap, nezaret altına aldılar», – dep aytıla TASS Rusiye agentligi aydınlatqan müessise haberinde.

Diger mustaqil menbalar bu malümatnı tasdıqlamay. Tutulğan insannıñ adı ve soyadı aydınlatılmay. Qırım.Aqiqat tafsilâtlı malümat almağa tırışa.

Fevralniñ 16-nda Ukraina Tış işler nazirligi, Azaq deñizinde Rusiye quvetçileri tarafından ukrain balıqçılarınıñ zapt etilüvi aqqında malümatnı teşkere, dep bildirdi.

Daa evel fevralniñ 16-nda Rusiye kontrolindeki Keriç şeer mahkemesi fevralniñ 15-nde Azaq deñizinde «qanunsız balıq tutqan» ukrain balıqçıdarını 10 künge apiske aldı.

Qırım ve Aqyardaki Rusiye FSBsiniñ idaresi fevralniñ 15-nde Azaq deñizinde dört Ukraina vatandaşı bulunğan gemi tutulğanını bildirdi. Rusiye kontrolindeki Qırım ombudsmeni Larisa Opanasük ukrain gemisiniñ taqımı Azaq deñizinde 48 saatqa tutuldı, dep ayttı.

Ukraina Devlet sıñır hızmetiniñ kütleviy haber vastaları ile bağ meseleleri bölüginiñ reberi Andriy Demçenko Qırım.Aqiqatqa izaat berip, müessise, Azaq deñizinde dört Ukraina vatandaşı bulunğan gemi Rusiye quvetçileri tarafından tutulğanını teşkere, dep bildirdi.

Daa soñra FSB, Azaq deñizinde tutulğan geminiñ kapitanı sorğuda qabaatını tanıdı, dep bildirdi.

2019 senesi yanvar ayında Rusiye kontrolindeki Qırımnıñ Yedi Quyu rayon mahkemesi 24 yaşında Qırım sakini Fevzi Sagancini «Ukrainada qanunsız silâlı birleşmede iştirak etkeninde» qabaatlap üküm çıqardı.

Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete.

Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.

«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.

XS
SM
MD
LG