Rusiye kontrolindeki Qırım Yuqarı mahkemesi fevralniñ 2-nde «Hizb ut-Tahrir davasınıñ» mabüsleri Vadim Bektemirov ve Emil Ziyadinovnıñ apiske alınmasına qarşı berilgen imaye istinafını red etti. Bu aqta advokatlar Marlen Halikov ve İslâm Velilâyev «Qırım birdemligine» bildirdi.
Mahkeme oturışuvı videokonferentsiya bağı vastasınen keçirildi.
«Qırım Yuqarı mahkemesi Kiyev rayon mahkemesiniñ 2020 senesi noyabrniñ 26-nda qabul etken qararını deñiştirmedi, er vaqıt kibi, tahmin etildi zaten», – dedi advokat.
Onıñ aytqanına köre, mahkeme oturışuvı ögüne Halikov Bektemirovnen SİZOda körüşti.
«Vadimnen körüşip, sağlıq vaziyeti aqqında soradım. Bir qarar. Soñki vaqıtları aşlar yahşı olmağanı içün tişleri ağıra ve aşqazan problemleri bar, dep ayta. O, SİZO memuriyetine bir qaç kere muracaat etti, lâkin ekimlerniñ iştiraki ile bir şey yapılmay. Umumen alı bir qarar», – dedi Marlen Halikov.
Qırımdaki mahkeme Emil Ziyadinovnıñ apis müddetiniñ uzatılmasına qarşı berilgen imaye istinafını red etti.
«Yuqarı mahkeme Kiyev rayon mahkemesiniñ 2020 senesi noyabrniñ 25-nde müvekkilimniñ sıñırlav tedbirini martnıñ 1-ne qadar uzatılmasına dair qabul etken qararını deñiştirmedi. Fevralniñ 15-ne qadar Cenübiy okrugınıñ arbiy mahkemesi ilk diñlevler belgileycek, dep tüşünem, o da, belki, videokonferentsiya rejiminde keçirilecek», – dedi advokat İslâm Velilâyev.
2020 senesi noyabrniñ 26-nda Moskva kontrolindeki Aqmescitniñ Kiyev rayon mahkemesi Vadim Bektemirovnı apiste tutuv müddetini 2021 senesi martnıñ 2-ne qadar uzattı. Bundan evel, 2020 senesi noyabrniñ 25-nde, bu mahkeme qırımlı Emil Ziyadinovnıñ da apis müddetini üç ayğa uzattı.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Rusiye FSBsiniñ malümatına köre, mahsus hızmetniñ hadimleri Qırımda «Hizb ut-Tahrirni» teşkil etkeninden ve iştirak etkeninden şübheli sayılğan yedi insannı tuttı. FSB, bu insanlar «Qırım sakinleri arasında terror mefküresini yayıp, qırımlı musulmanlarnı öz saflarına celp etti», dep bildire. Rusiye mahsus hızmetiniñ matbuat hızmeti bildirgenine köre, «(teşkilât) azalarınıñ yaşağan yerlerinde Rusiyede yasaqlanğan «Hizb ut-Tahrir al-İslami» propaganda malümatları, terror faaliyetinde qullanılğan bağ vastaları, elektron malümat taşıyıcıları tapılıp alındı».
Ukraina prezidentiniñ Qırım Muhtar Cumhuriyetindeki temsilciligi Rusiye quvetçileriniñ areketlerini takbih etti, Milliy politsiyanıñ Qırım Muhtar Cumhuriyeti ve Aqyar Baş idaresi ise Ukraina Ceza kodeksiniñ 162-nci maddesiniñ 2-nci qısmına istinaden (mesken tiyilmemezligini bozuv) cinaiy tahqiqat başlattı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
