Rusiye kontrolindeki Qırım Yuqarı mahkemesi Aqmescitteki ekinci «Hizb ut-Tahrir davasınıñ» mabüsleri Yaşar Muyedinov, Seyran Murtaza ve Tofik Abdulgaziyevniñ sıñırlav tedbirlerini 2021 senesi yanvarniñ 14-ne qadar uzattı. Oturışuv neticeleri aqqında qırımtatar faalleriniñ imayecileri tarif etti.
Bütün mahkeme esnasları Qırımdaki epidemiologik vaziyetten sebep qapalı oldı. İmayeci Venera Abdışayevanıñ aytqanına köre, mahkeme advokat ve müvekkiliniñ muracaatlarını kene red etti.
«Biz açıq mahkeme olsun dep muracaat ettik, mahkeme bu muracaatımıznı red etti, madde ağır dep. O, Dördünci Jeneva Şartnamesi qullanılmalı ve daa yımşaq sıñırlav tedbiri belgilenmeli, dep ayttı», – dep izaatladı Venera Abdışayeva.
Advokat Emil Kurbedinovnı tahqiqat izolâtorında bulunğan Tofik Abdulgaziyevniñ qulaqları zayıflaşqanından qasevetlene,
«Şimdi pek yaramay eşite. Oña tibbiy yardım kösterilsin dep rica etecek dedi. Bir közünde kapillârlar pek patlağanını kördim. Keyfi ise pek güzel», – dep qayd etti advokat Kurbedinov.
Apiske alınğan faaller qırımtatar halqına ve olarğa Qırımda ve onıñ tışında qol tutqan er keske teşekkürler bildirdi.
«Maña da biñ kere ayttı: «Bizge yardım etken er keske teşekkürlerimni bildir. Advokat, cemaat sağ olsunlar – çette qalmayıp, yardım eteler», – dep ayttı advokat Kurbedinov müvekkili Tofik Abdulgaziyevniñ aytqanlarına esaslanıp.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Tutulğanlar arasında qırımtatar cemaat jurnalistleri Rustem Şeyhaliyev, Osman Arifmemetov ve Remzi Bekirov bar ediler.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
