Martnıñ 27-nde Qırımda kütleviy tintüvler vaqtında tevqif etilgen bütün qırımtatar faalleriniñ adları ve tutulğan yerleri belli oldı. Cedvelni Qırım.Aqiqatqa «Qırım birdemligi» cemaat birleşmesi berdi.
Tofik Abdulgaziyev, Alim Karimov, Yaşar Muyedinov ve İzzet Abdullayev qomşu Rusiyeniñ Şahtı şeerindeki №4 SİZOda tutula. Olar Rusiye Ceza kodeksiniñ 205.5 maddesiniñ 2-nci qısmına (terrorist teşkilâtınıñ faaliyetinde iştirak etüv) istinaden qabaatlana.
Vladlen Abdulkadırov, Bilâl Adilov, Osman Arifmemetov, Farhod Bazarov, Akim Bekirov, Servet Gaziyev, Seytveli Seytnabdiyev ve Rustem Şeyhaliyev Rusiyeniñ Rostov-na-Donu şeerindeki №1 SİZOda tutula. Farhod Bazarovdan ğayrı episi Rusiye Ceza kodeksiniñ 205.5 maddesiniñ 2-nci qısmına (terrorist teşkilâtınıñ faaliyetinde iştirak etüv) istinaden qabaatlana.
Mecit Abdurahmanov, Enver Ametov, Seyran Murtaza ve Rustem Seythalilov Rusiyeniñ Taganrog şeeriniñ №2 SİZOsında tutula. Olar Rusiye Ceza kodeksiniñ 205.5 maddesiniñ 2-nci qısmına (terrorist teşkilâtnıñ faaliyetinde iştirak etüv) istinaden qabaatlana.
Remzi Bekirov, Riza İzetov, Şaban Umerov ve Ruslan Suleymanov Rusiyeniñ Rostov-na-Donu şeeriniñ №4 SİZOsında tutula. Olar Rusiye Ceza kodeksiniñ 205.5 maddesiniñ 1-inci qısmına (terrorist teşkilâtınıñ faaliyetini teşkil etüv) istinaden qabaatlana.
Cemil Gafarov, Erfan Osmanov ve Asan Yanikov Rusiyeniñ Rostov-na-Donu şeerinde №5 SİZOda tutula. Olar Rusiye Ceza kodeksiniñ 205.5 maddesiniñ 2-nci qısmına istinaden qabaatlana.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Martnıñ 27-nde ve 28-nde Aqmescitniñ Kiyev rayon mahkemesi tutulğan faallerni apiske aldı.
Martnıñ 29-nda Rusiye uquq qoruyıcıları Qırımdaki tintüvlerden soñ qıdırılğan qırımtatar faali Edem Yayaçikovnı tutıp aldı.
Aqmescitniñ Bavurçı qasabasında keçirilgen tintüv vaqtında semetdeşlerine qoltutmağa kelgenlerden eki kişi Eskender Mamutov ve Emil Ziyadinov da tutuldı. Aqmescit mahkemesi Ziyadinovğa «politsiyağa qarşı çıqqanı içün» 500 ruble para cezasını berdi. Mamutov ise 5 künge apiske alındı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
Martnıñ 29-nda Qırımnıñ Rusiye ombudsmeni Lüdmila Lubina Qırım.Aqiqatqabildirgenine köre, Qırımda tevqif etilgen 23 qırımtatar faalini Rusiyege alıp ketkenler.
