Aqmescit rayonındaki Rusiye politsiyasınıñ hadimleri bir qaç kün evelsi büyüklerge haber etmeyip belli olmağan yerge ketken ve qıdırılğan eki genç ağa-qardaşnı taptı. Oğlanlar ormanda tapıldı. Bu aqta Qırımdaki Rusiye İç işler nazirliginiñ matbuat hızmeti bildire.
Qayd etilgenine köre, politsiya gençlerni aprelniñ 8-nden berli qıdırdı. Cep telefonları olmağanı içün qıdırmaq zor edi.
«Politsiya hadimleri ve göñülliler Aqmescit rayonını baqıp çıqtı, Qırım paytahtında da qıdıruv işleri keçirildi. Neticede ağa-qardaş politsiya hadimleri tarafından ormanda tapıldı, bu vaqıt devamında açıq avada qalıp, ateş yanında qızğan ediler», – dep bildire politsiya.
Müessise, olarğa qarşı qanunsız bir şey yapılmadı, dep işandıra.
«Politsiya alğan malümatqa köre, balalarnıñ vasiylerinden qaçmaq içün ciddiy bir sebebi yoq edi, yapqanları ise bala çayalığı edi», – dep bildirdi Rusiye politsiyası.
Daa evel haber etilgenine köre, ğayıp olğan çağına yetmegen ağa-qardaş Suleyman ve Roman Kemaller işğal etilgen Qırımda qıdıruvğa ilân etildi. Ekisi de 2020 senesi aprelniñ 6-nda Aqmescit rayonınıñ Davıdovka köyünde evden çıqıp qaytmadı.
