Ğayıp olğan çağına yetmegen ağa-qardaş Suleyman ve Roman Kemaller işğal etilgen Qırımda qıdırıla. Ekisi de 2020 senesi aprelniñ 6-nda Aqmescit rayonınıñ Davıdovka köyünde evden çıqıp qaytmadı.
Bu aqta Qırımdaki Rusiye İç işler nazirliginiñ matbuat hızmeti bildirdi.
«Kemal Suleymannıñ belgileri: 16-17 yaşlarında, boyu 165 sm, qoyu renkli saçlı, açıq tüs közlü, yay qaşlı, arıq. Kemal Romannıñ belgileri: 14-16 yaşlarında, arıq, boyu 155 sm, qoyu renkli közlü, qoyu renkli saçlı, tüz qaşlı», – dep aytıla haberde.
Berilgen malümatqa köre, Suleymannıñ üstünde qoyu mavı cins, qaverenki ayaqqap ve qara başlıqlı urba, yanında yeşil ve qaverenki tüsleri olğan boz çantası bar.
Aynı vaqıtta, politsiya matbuat hızmetiniñ malümatına köre, Roman açıq yeşil cins, qoyu mavı ve qaverenki çizgili ayaqqap, qırmızı başlıqlı urba, portaqal kurtkağa kiyingen, yanında yeşil ve qaverenki çizgili çantası bar.
Daa evel Kefede öz doğğan kününde qadın ğayıp oldı, dep haber etildi.
Qırımdaki Rusiye politsiyası 2017 senesi oktâbrniñ 10-nda Yaltadaki «Mishor» şifahanesinden çıqqan ve qaytmağan Rusiye vatandaşı İrina Bıstrovanı da qıdıruvğa ilân etti.
