Birleşken Milletler bu seneniñ ilk yarım yılında işğal etilgen Qırımnıñ ev ve toplaşuv yerlerinde yapılğan tintüvlerniñ sayısı keçken seneniñ yarım yılına baqqanda üç qat çoq olğanını qayd ete. Bu aqta işğal altındaki Qırımnıñ insan aqları vaziyetine dair maruzasında aytıla. Vesiqa sentâbrniñ 13-nde Kyivde Ukrainadaki BM insan aqları monitoring missiyasınıñ reisi Fiona Freyzer tarafından taqdim etildi.
Teşkilâtnıñ malümatına köre, qırımtatar faalleri tintüvlerden eñ büyük zarar kördi.
«İnsan aqları yuqarı komissarınıñ idaresi 2017 senesi 57 tintüv keçirilgenini qayd etti, olardan 53-ü qırımtatarlarnıñ evlerinde oldı, 2018 senesiniñ ilk yarım yılı içinde ise 38 tintüv keçirildi, olardan 30-ı da qırımtatarlarnıñ evlerine rastkeldi», — dep aytıla esabatta.
Vesiqa müellifleri qayd ete ki, umumen alğanda mezkür tintüvler mahkemelerniñ qararları esasında keçirildi, amma izin vesiqaları kösterilmeyip tintüv yapılğan allar da çoq oldı, bazı vaqıtları ise küç de qullanılğan edi.
Ukraina tış işler nazirligi işğal etilgen Qırımda faallerniñ evlerinde keçirilgen tintüvlerden sebep Rusiyege defalarca narazılıq bildirgen edi.
Sentâbrniñ 13-nde saba Rusiye uquq qoruyıcıları «Qırım birdemliginiñ» faali Osman Belâlovnıñ evinde tintüv keçirdi. Faal evde degil edi, tintüvden soñ Belâlovlarnıñ babası tutuldı.
Bundan ğayrı, Birleşken Milletler Rusiyeni halqara missiyalarğa işğal altındaki Qırımğa kirmege imkân bermesine çağırğan edi.
Rusiye Qırımnı işğal etken soñ andaki akimiyet mustaqil jurnalist, cemaat faalleri, qırımtatar milliy areketiniñ faalleri, Milliy Meclis azaları ve Rusiyede yasaqlanğan «Hizb ut-Tahrir» teşkilâtınen alâqaları bar olğanında şeklengen Qırım musulmanlarınıñ evlerinde sıq-sıq tintüv keçire.
