Bağçasarayda rusiyeli telükesizlik hadimleri “Qırım birdemligi”niñ faali Osman Belâlovnıñ evinde tintüv ötkergen soñ, onıñ babasını rayon politsiya bölügine alıp ketken. Bu aqta birleşmeniñ Facebook saifesinde haber etile.
Ayrıca tintüv yerine alıp barğan yolüzerinde GİBDD hadimleri turıp er kesniñ vesiqalarını teşkermekte.
Memet Belâlovnıñ apayı – Ediye – aytıp bergenine köre, Osman Belâlov ne yerde olğanı ale daa belli degil eken.
Malümat derc etilgen maaldegece rusiyeli telükesizlik hızmetleri tintüv boyunca iç bir bir izaat bermedi.
Sentâbrniñ 13-nde saba rusiyeli telükesizlik hadimleri “Qırım birdemligi”niñ faali Osman Belâlovnıñ evinde tintüv ötkerdi.
Osman Belâlov Bağçasaraydaki “Hizb ut-Tahrir davası”nıñ iştirakçisi Memet Belâlovnıñ qardaşı ola.
2016 senesi Qırımnıñ rusiyeli mahkemesi Osman Belâlovqa 10 biñ ruble para cöremesi tayin etken edi. O, 2016 senesi mayısnıñ 12-nde Bağçasaraydaki “Salaçıq” kafesi yanında “ruhsetsiz mitingte” iştirak etüvde qabaatlanğan edi. O künü faaller rusiyeli telükesizlik hadimleri qırımtatarlarda tintüvyapqanını eşitip, kafe yanında toplanğan ediler.
