Qırımda trenajor salonları ve fitnes merkezleri iyünniñ 15-nden itibaren çalışıp başlaycaq. Yüksek seviyeli azırlıq buyruğınıñ tüzetüvlerini Qırımnıñ Rusiye yolbaşçısı Sergey Aksenov imzaladı.
Sport salonlarında şimdilik ayrı dersler yapılacaq.
Bu müessiseler yarımadada koronavirus pandemiyası başlağanında berli qapalı edi.
Rusiye işğal etken Qırımda iyünniñ 15-nde şifahane-kurort kompleksi Rospotrebnadzor talaplarına uyğun bir şekilde çalışıp başlaycaq, lâkin tek qırımlılar raatlana bilecek.
Otel ve musafirhaneler raatlanmağa kelgenler içün şifahane-kurort ve musafirhane kompleksi obyektleriniñ açılmasınıñ ekinci etapında açılacaqtır.
Qırımda turistlerni esapqa aluv elektron sistemasını açmağa planlaştıralar.
Bundan evel Aksenov karantin tedbirleri bitkenine qadar Qırımğa kelmemege rica etti. Aprelniñ 29-nda Qırımda evi ve mülki olmağanlar kelse, 14 künge observatorğa alınmalı, dep bildirdi.
Rusiye kontrolindeki Qırım akimiyeti mayısnıñ 24-nden itibaren observatorda qaluv parasınıñ kirsetilüvini «telükesizlik tedbirleriniñ quvetleştirilmesi» dep adlandıra. Bu da regionda kurort mevsiminiñ başlanmasına yardım etecek, deyler.
