Qırımda turistlerni esapqa aluv elektron sistemasını açmağa planlaştıralar. Bu aqta Rusiye kontrolindeki Qırım ükümeti bildire.
«Kurort ve turizm nazirligi Devlet hızmetleriniñ portalını qullanuv ya da ayrı programma esasında Qırımğa kelgenlerni esapqa aluv ve qayd etüv elektron sistemasını açmağa planlaştıra. Maqsat tek kelgen turistlerni qayd etmek ve qalğan yerlerini bilmek degildir, şimdikki vaziyette em raatlanğanlar, em de qırımlılar içün qoşma telükesizlik kefaletidir», – dep bildirdi akimiyet.
Turistlerni qayd etüv elektron sistemasınıñ kirsetilüvi Qırımda şifahane-kurort kompleksi işiniñ yañıdan başlatıluvınıñ ekinci basamağında beklenile. O, 2020 senesi iyülniñ 1-nden soñ başlaycaqtır.
Otel ve musafirhaneler raatlanmağa kelgenler içün şifahane-kurort ve musafirhane kompleksi obyektleriniñ açılmasınıñ ekinci etapında açılacaqtır .
Qırımnıñ Rusiye yolbaşçısı Sergey Aksenovnıñ bildirgenine köre, Qırımda iyünniñ 15-nde şifahane-kurort kompleksi Rospotrebnadzor talaplarına uyğun bir şekilde çalışıp başlaycaq, lâkin tek qırımlılar raatlana bilecek.
Bundan evel Aksenov karantin tedbirleri bitkenine qadar Qırımğa kelmemege rica etti. Aprelniñ 29-nda Qırımda evi ve mülki olmağanlar kelse, 14 künge observatorğa alınmalı, dep bildirdi.
Rusiye kontrolindeki Qırım akimiyeti mayısnıñ 24-nden itibaren observatorda qaluv parasınıñ kirsetilüvini «telükesizlik tedbirleriniñ quvetleştirilmesi» dep adlandıra. Bu da regionda kurort mevsiminiñ başlanmasına yardım etecek, deyler.
