Qırım ve Aqyardaki Rospotrebnadzor idaresiniñ yolbaşçısı Natalya Penkovskaya bildirdi ki, soñki afta yarımadada pandemiya vaqtında koronavirustan vefat etken insanlarnıñ eñ büyük sayısı qayd etildi.
Bu aqta o, noyabrniñ 18-nde bu yuqunç ile küreş operativ ştabınıñ toplaşuvında bildirdi.
«E, soñki afta vefat etkenlerniñ sayısı çoq oldı, keçken afta 42 vefat qayd etildi. Bu bütün müddet devamında vefat sayısında antirekord oldı. Oktâbrde 75 vefat oldı, noyabrniñ – 81», – dep qayd etti Penkovskaya.
Onıñ malümatına köre, ölümniñ esas sebebi – yürek-damar hastalıqları.
Keçken künü Qırımda 211 koronavirus hastası qayd etildi, 12733 COVID-19 hastası qayd etildi, 8275 tüzelgen soñ hastahaneden çıqarıldı, 222 hasta vefat etti. Aqyarda 3636 insan yañı koronavirus yuqunçına oğradı, 2915 insan tüzeldi, 99 kişi vefat etti.
Rospotrebnadzor, yañı koronavirus hastalarınıñ sayısı dekabrniñ ortasında pek artacaq, dep bekley.
Rusiye kontrolindeki Qırım yolbaşçısı Sergey Aksenovnıñ aytqanına köre, koronavirus hastalığı tarqalğanı içün Qırımda yañı yıl korporativleri ve bayram furşetleri lâğu etilecek.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
