Qırım ve Aqyardaki Rospotrebnadzor idaresiniñ yolbaşçısı Natalya Penkovskaya bildirgenine köre, yarımadada yañı koronavirus hastalarınıñ sayısı dekabrniñ ortasında artacaq dep beklenile.
Bu aqta o, noyabrniñ 18-nde COVID-19 ile küreş operativ ştabınıñ toplaşuvında bildirdi.
«Dekabrniñ 20-lerine tahmin etilgen hasta artışına baqıp ve sıñırlav tedbirleri kerige qoyacağını añlap, insanlar çoq toplaşacaq yañı yıl bayramlarfı arfesinde bir sıra sıñırlav tedbirinen bağlı tekliflerimizni bildirdik. Bu bugünniñ talaplarıdır, azırlanıp, hasta sayısınıñ artmasına ve hastalıq tarqalmasına yol bermemek kerekmiz», – dedi Penkovskaya.
Onıñ aytqanına köre, şimdi qoşma sıñırlav tedbirleri alınmasa, yanvar ayında Qırımnıñ sağlıq sisteması hasta sayısınıñ artmasına dayanıp olamaz.
Keçken künü Qırımda 211 koronavirus hastası qayd etildi.
Rospotrebnadzor yolbaşçısı Anna Popova işğal etilgen Qırımda yañı koronavirus yuqunçı hastalıq seviyesini «bayağı yüksek» dep adlandırdı. Daa bir afta evelsi Qırım ve Aqyardaki Rospotrebnadzor idaresi Qırımda COVID-19 hastalarınıñ sayısı artmay, dep bildirgen edi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
