Keçken künü Qırımda 211 koronavirus hastası qayd etildi, 38-iniñ hastalıq alâmetleri yoq, dep haber ete Qırımnıñ Rusiye yolbaşçısı Sergey Aksenov.
«150 hasta tibbiy yardım içün muracaat etkende qayd etildi, 61-i daa evel qayd etilgen hastalarnen alâqada oldı. Keçken künü yañı koronavirus yuqunçı tedqiqlerini yapqan bütün laboratoriyalar 3973 insannı teşkerdi. Umumen 8275 insan tüzeldi», – dep aytıla içtimaiy ağlardaki haberinde.
Rospotrebnadzor yolbaşçısı Anna Popova işğal etilgen Qırımda yañı koronavirus yuqunçı hastalıq seviyesini «bayağı yüksek» dep adlandırdı. Daa bir afta evelsi Qırım ve Aqyardaki Rospotrebnadzor idaresi Qırımda COVID-19 hastalarınıñ sayısı artmay, dep bildirgen edi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
