Aqmescitte dekabrniñ 12-nde «Qırım ğayesiniñ» konferentsiyası olıp keçti. Bu birleşmege qırımlı aq qorçalayıcı teşebbüsleri kirdi. Teşkilâtçılarnıñ aytqanına köre, «Rusiye quvetçileriniñ qorqutuvları» sebebinden konferentsiyanı dekabrniñ 10-nda keçirip olamadılar.
Qırım.Aqiqat mühbiriniñ bildirgenine köre, tedbirde söz serbestligi aqqınıñ bozuluvı, ana tilinde tasil vaziyeti, ealiniñ gibrid sürgünligi alâmetleri, repressiyalarnen bağlı bala aqlarınıñ bozuluvı ve yarımadadaki qanunlarnıñ diger hususiyetleri muzakere etildi.
Qırımtatar milliy areketiniñ faali Nariman Celâl çıqışta bulunıp, tedbir eki kün evelsi – insan aqlarını qoruv kününde – keçirilmek kerek edi, dep ayttı. Faqat «yer saibine yapılğan basqı sebebinden konferentsiyanı keçirip olamadılar».
«Biz inatmız ve bugün yarımadada bozulğan insan aqları aqqında laf etmek içün kene toplaştıq», – dep qayd etti Celâl.
Dünya insan aqlarını qorçalav kününde, dekabrniñ 10-nda, «Qırım ğayesi» teşebbüsiniñ teşkilâtçıları 2014 senesinden berli yarımadada ilk olacaq aq qorçalayıcı konferentsiyasını keçirip olamadı. Advokat Emine Avamilevanıñ qayd etkenine köre, «böyle vaziyetniñ endi tendentsioz tarzı bar».
Rusiye uquq qoruyıcı organları qırımlı aq qorçalayıcılarnıñ malümatını şimdilik izaatlamadı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
