Dünya insan aqlarını qorçalav kününde, dekabrniñ 10-nda, «Qırım ğayesi» teşebbüsiniñ teşkilâtçıları 2014 senesinden berli yarımadada ilk olacaq aq qorçalayıcı konferentsiyasını keçirip olamadı. Olarnıñ aytqanına köre, «Rusiye uquq qoruyıcıları olarnı qorquzmağa başladı».
Bu aqta qırımlı aq qorçalayıcı Abdureşit Cepparov tarif etti, dep bildire Qırım.Aqiqat mühbiri.
«Tedbir başlamazdan evel bugün toplaşqan yerimizniñ saibine telefon etip tenbilediler: tedbir lâğu etilmese, onıñ problemleri olacaq. Bu insannı yahşı bilemiz ve onı telükege oğratmağa istemeymiz, şunıñ içün konferentsiyanı belli olmağan vaqıtqa qaldırmağa qarar aldıq», – dep tarif etti aq qorçalayıcı.
Advokat Emine Avamilevanıñ qayd etkenine köre, «böyle vaziyetniñ eñ tendentsioz tarzı bar».
«Bizge yer berilmedi. Qırımda insan aqları muntazam sürette bozula. Ve bugün bunı açıq aytmağa imkân berilmegeni – bunıñ delilidir», – dep ayttı Avamileva.
Rusiye uquq qoruyıcı organları qırımlı aq qorçalayıcılarnıñ malümatını açıq sürette izaatlamadı.
