Qırımda 184 yañı koronavirus hastası qayd etildi, 29-ınıñ hastalıq alâmetleri yoq, dep bildirdi Qırımnıñ Rusiye yolbaşçısı Sergey Aksenov.
«138-i tibbiy yardım içün muracaat etkende belli oldı, 44-ü daa evel qayd etilgen hastalarnen alâqada oldı, 2-si çetelden keldi», – dep aytıla içtimaiy ağlardaki haberinde.
Onıñ malümatına köre, Qırımda pandemiya vaqtında 9831 insan tüzeldi. Qırımnıñ Rusiye sağlıq nazirliginiñ malümatına köre, 248 hasta koronavirustan vefat etti. Aqyarda 3925 insan yañı koronavirus yuqunçına oğradı, 3292 kişi tüzeldi, 102 insan vefat etti.
Rospotrebnadzor, yarımadada COVID-19 hastalarınıñ sayısı dekabrniñ ortasında pek artacaq dep bekleyler, dep qayd etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
