Qırım ve Aqyarda qızamıq çıqarğanlarnıñ sayısı arta. Bu aqta aprelniñ 22-sinde Rospotrebnadzornıñ Qırım idaresi bildirdi.
“2019 senesiniñ devamında Qırım ve Aqyarda qızamıq hastalığınıñ 138 adisesi qayd etildi, olardan 127-si Qırım cumhuriyetinde, 11-i - Aqyarda. Qızamıq epidemiyasına (qıta - QA) Ukrainadan ketirilgen infektsiya ve aşılanmağan adamlar sebep oldı”, - denile beyanatta.
Qırım ve Aqyarda qızamıq hastalığı adiseleri arta, dep bildirgen edi Rospotrebnadzornıñ Qırım idaresi. 2019 senesinde 114 qızamıq çıquvı qayd etildi, olardan 106-sı Qırımda, 8-i ise Aqyarda.
Aprelniñ 2-sinde Qırım yarımadasında yılnıñ başından 101 qızamıq çıquvı qay etildi, dep bildire edi.
Qırımda aprelniñ 1-nden başlap ealige qızamıqqa qarşı qoşma aşı yapılıp başladı. Bu aqta Qırımnıñ Rusiye sağlıq nazirliginiñ matbuat hızmeti bildirdi.
2018 senesi Dünya sağlıq teşkilâtı Avropada qızamıq hastalığınıñ rekord seviyesine çıqqanını qayd etti. Birinci 6 ayda 41 biñ insan qızamıq oldı, soñki 10 yılda er yıl olğanından daa ziyade.
Qızamıq adamdan-adamğa qolaylıqnen keçe, öksürik, yaqın toqunuvlarnen keçe. Virus eki saat devamında faal qalıp, avada ya da ten üstünde yaşay. Hasta başta sade suvuqlanuv alâmetlerini duya: tımav, sıcaqlıq, öksürik, tahminen bir aftadan eşken peyda ola (evelâ başta, soñ - bedenniñ yuqarı ve tüpteki qısımlarında). Qızamıq sebep olğan ağırlaşuvlarnıñ arasında - siñir sistemasınıñ zararlanuvı (entsefalit), pnevmoniya, otit, körüv qabiliyetiniñ ğayıp oluvı bar.
