Qırım ve Aqyarda qızamıq hastalığı adiseleri arta, dep bildire Rospotrebnadzornıñ Qırım idaresi.
“2019 senesinde 114 qızamıq çıquvı qayd etildi, olardan 106-sı Qırımda, 8-i ise Aqyarda”, - denile beyanatta.
Rospotrebnadzornıñ Qırım idaresinde, qızamıq epidemiyasının sebepleri - Ukrainadan kelgen hasta adamlar ve qızamıqqa qarşı aşılanmağan yerli sakinler.
Aprelniñ 8-ine Qırımda 2839 insan aşılandı, olarnıñ arasında 592 bala, Aqyarda ise 206 kişi, olardan 30-ı bala.
Aprelniñ 2-sinde Qırım yarımadasında yılnıñ başından 101 qızamıq çıquvı qay etildi, dep bildire edi.
Qırımda aprelniñ 1-nden başlap ealige qızamıqqa qarşı qoşma aşı yapılıp başladı. Bu aqta Qırımnıñ Rusiye sağlıq nazirliginiñ matbuat hızmeti bildirdi.
2018 senesi Dünya sağlıq teşkilâtı Avropada qızamıq hastalığınıñ rekord seviyesine çıqqanını qayd etti. Birinci 6 ayda 41 biñ insan qızamıq oldı, soñki 10 yılda er yıl olğanından daa ziyade.
Qızamıq adamdan-adamğa qolaylıqnen keçe, öksürik, yaqın toqunuvlarnen keçe. Virus eki saat devamında faal qalıp, avada ya da ten üstünde yaşay. Hasta başta sade suvuqlanuv alâmetlerini duya: tımav, sıcaqlıq, öksürik, tahminen bir aftadan eşken peyda ola (evelâ başta, soñ - bedenniñ yuqarı ve tüpteki qısımlarında). Qızamıq sebep olğan ağırlaşuvlarnıñ arasında - siñir sistemasınıñ zararlanuvı (entsefalit), pnevmoniya, otit, körüv qabiliyetiniñ ğayıp oluvı bar.
