Rusiye kontrolindeki Qırım ve Aqyar musulmanları diniy idaresi Aqmescitteki Cuma Cami açılışınıñ kününi kene deñiştire. Qırım müftisiniñ muavini Esadullah Bairovnıñ bildirgenine köre, qurucılıq 2021 senesiniñ soñunda bitecektir.
«Camini 2021 senesi açmağa ister edik, baarde ya da küzde. Ne yazıq ki, malzeme ve mütehassıslarnen bağlı imkânlar açılmağanı içün açılış 2021 senesiniñ soñuna qala. Baarde sıñırlavlarnıñ ekseriyeti lâğu etilse, camini kelecek sene açmaq içün dua ete ve çalışamız», – dedi Bariyev.
Onıñ aytqanına köre, memuriy bina ve musafir evi aman-aman azır, cami qurucılıq işleri ise daa dört-beş ay devam etecek.
«Camide işlerniñ 20 fayızı qalğandır. Bütün insanlar kirsetilse, dört aylıq iş qalacaq. Amma bunı ne qadar tez yapa bilecekmiz, bu iş dört ayda aralıqsız bitermi, tahmin etip olamaymız», – dep ayttı Bairov.
«Putinniñ imic leyhası»: Aqmescitteki Cuma Cami (fotoresimler)
Onıñ bildirgenine köre, eñ yaqın vaqıtta cami qubbesi qurşunnen örtülecek, binanıñ büyük qısmı mermernen qaplandı.
Rusiye akimiyeti Aqmescitteki yañı Cuma Camini 2019 senesi aprelniñ 21-nde açmağa planlaştırğan edi – Rusiye prezidentiniñ Qırımnıñ sürgün etilgen halqlarnıñ reabilitatsiya buyruğını imzalamasınıñ beşinci yılında. Daa soñra yañı kün aytıldı – 2020 senesi aprelniñ 21-i.
Leyhağa köre, Aqmescitteki Cuma Cami 5,7 biñ metr kârelik olıp, 2,6 biñ insannı sığdıracaq. İnşaat eki qısımdan ibaret – qubbeli esas bina ve kolonnalı ve abdesthaneli iç azbar. Cami qurucılığı 2016 senesi oktâbr ayında başladı, onı 2019 senesiniñ soñunda bitirmege planlaştırıla.
