2020 senesiniñ aprel ayı. Yalta yolunıñ eñ başındaki şahsiy sektor üstünde beş qulleli qubbe körüne. Dört qulle – Aqmescit Cuma Camisiniñ minareleridir, daa bir – qırmızı qulle kranıdır. Qırımda COVID-19 pandemiyası sebebinden özüni izolâtsiya etüv rejimine baqmadan, cami qurucılığı devam ete.
Qurucılar bir yıl keç qala – Qırımnıñ Rusiye akimiyeti camini 2019 senesi aprelniñ 21-nde açmağa vade etken edi. Rusiye prezidenti Vladimir Putinniñ Qırımnıñ sürgün etilgen halqlarınıñ reabilitatsiyasına dair buyruğını imzalağanından 5 yıl keçken edi. Şimdi ise yañı müddetler aydınlatıla – 2020 senesiniñ iyün ayı.
Başta Cuma Cami eki prezident – Ukraina ve Türkiye – imayesi altında qurulacaq edi. 2014 senesi aprel ayında hatıra taşını ve bina temelini qoyacaq ediler. Qırımnıñ Rusiye işğali sebebinden planlar deñişti, artıq Türkiye prezidenti Recep Tayyip Erdoğannı Rusiye prezidenti cami açılışına davet ete.
İşğalden soñ Rusiye eyyeti erkânında Türkiyege bir qaç kere barğan Rusiye Devlet dumasınıñ Qırım deputatı Ruslan Balbek ise cami açılışı «halqara bayram» olacaq, dep ayta: «Qırımtatarlar, musulmanlar öz evinde Cuma Cami açılışında pek müim musafirlerni qarşılamağa azırlanmalı».
Bazı qırımtatar faalleri de cami qurucılığını «savap iş» dep adlandıra. Aynı vaqıtta qayd etkenlerine köre, cami diniy sebeplerden taqip etilecek yañı insanlarnı tapacaq «FSB yeri olmamalı». Qırımtatar Milliy Meclisiniñ azası Eskender Bariyevniñ fikirince, Aqmescitteki Cuma Caminiñ gumanitar ya da içtimaiy-medeniy vazifesi yoq: «Putinniñ imic leyhasıdır, Keriç köprü, «Tavrida» yolu ve ala limanı kibi».
Cuma Cami qurucılıqnıñ bu basamağında nasıl körüne – Aqmescitten kelgen fotoresimlerde baqıñız.
Facebook Forum