Ukraina prezidenti Volodımır Zelenskıy, Ukraina Rusiye işğal etken Qırım ve Donbas topraqlarını öz kontroli altına qaytaracaq, dep bildirdi.
İnsanlarımıznı ve topraqlarımıznı mıtlaqa qaytaracaqmızVolodımır Zelenskıy
Bu aqta Volodımır Zelenskıy dekabrniñ 6-nda qayd etilgen Ukraina Silâlı quvetleriniñ Künü munasebetinen çıqarğan video levhasında ayttı.
«İnsanlarımıznı ve topraqlarımıznı mıtlaqa qaytaracaqmız. Donbas – Ukrainadır. Lugansk – Ukrainadır. Qırım – Ukrainadır», – dedi Zelenskıy.
Ukraina prezidentiniñ qayd etkenine köre, al-azırda Ukraina «beş yıl evelsi olğanından daa küçlüdir».
Zelenskıy ğarbiy kütleviy haber vastaları, hususan Gazeta Wyborcza Poloniya neşirine intervyü berip, Qırımnıñ keleceginen bağlı muzakereler Ukraina-ABD-Rusiye formatında keçirile bile, dep ayttı.
Qırım meselesinde ABD yardım ete bile, dep tüşünemVolodımır Zelenskıy
«Qırım meselesinde ABD yardım ete bile, dep tüşünem. Muzakerelerniñ bu formatında Ukraina, Rusiye, ABD ola bile», – dep qayd etti Zelenskıy.
O, dekabrniñ 9-nda olacaq «normand sammitinde» diger liderlerde böyle formatnıñ ihtimali aqqında sorar, dep bildirdi. Bu imkânsız olsa ise, Ukraina prezidenti Qırımnen bağlı muzakerelerniñ diger formatını belgilemege ister edi.
Zelenskıynıñ aytqanına köre, Qırım meselesi «şimdi bir yerde laf etilmey, Ukraina halqara ortaqlarınıñ yalıñız beyanatları bar».
«Minsk» formatına farqlı qıymet kesmek mümkün, amma bu, eñ azından, muzakere içün bir yer ola. Qırım meselesi soñki beş yıl devamında halqara formatta muzakere etilmegen edi», – dep bildirdi Zelenskıy.
Dekabrniñ 2-nde Rusiye prezidenti Vladimir Putinniñ matbuat kâtibi Dmitriy Peskov, Putin Qırımnıñ aitlik meselesini Ukraina prezidenti Volodımır Zelenskıy ile muzakere etmeycek, dep bildirdi.
«Mında bir cevap olamaz. Qırım meselesiniñ muzakere etilmesi imkânsız. Bu aqta çeşit seviyelerde çoq aytılğan edi», – dep bildire Peskovnıñ aytqanlarını «İnterfaks» Rusiye agentligi.
Ukraina prezidenti Volodımır Zelenskıy Qırım.Aqiqatqa intervyü berip, «Qırım içün «Ştaynmayyer formulası yoq» ve halqara ortaqlar olmasa, yarımadanı işğalden qurtarmaq imkânsız olacaq, dedi.
Qırım.Aqiqat bildirgeni kibi, Qırımtatar Milliy Meclisiniñ reisi Refat Çubarov Zelenskıynı Qırım meselesini dekabrniñ 9-nda «normand formatındaki» körüşüv vaqtında kötermege çağırdı.
Meclis reisi, Ukraina prezidentini «Ukraina topraq bütünliginiñ halqara seviyede tanılğan sıñırlarda, Qırım Muhtar Cumhuriyeti, Aqyar şeeri ve Qara ve Azaq deñizlerinen beraber ğayrıdan tiklenmesini» talap etmesine çağırdı.
«Normand formatındaki» körüşüv dekabrniñ 9-nda Parijde ötkerilmeli. Böyle muzakereler soñki sefer 2016 senesi oktâbr ayında keçirilgen edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
