Link açıqlığı

Saatnıñ esas haberi

«Qırım platforması» sammitinde iştirak eteсek memleketlerniñ sayısı 37 oldı – Kuleba


Ukraina TİN başı Dmıtro Kuleba
Ukraina TİN başı Dmıtro Kuleba

Ukraina TİN başı Dmıtro Kuleba, daa üç Avropa memleketi «Qırım Platforması» sammitinde iştirak etecegini tasdıqlağanını bildirdi.

«Birden üç Avropa memleketi avgustnıñ 23-nde keçiririlecek «Qırım platforması» sammitinde iştiragini tasdıqladı. Bütün iştirakçilerniñ sayısı 37 oldı. «Qırım platformasına» halqara destek kettikçe arta, buña köre yañı müsbet cevaplarnı bekleymiz», – dep yazdı nazir.

Dmıtro Kulebanıñ bildirgenine köre, «Qırım platforması»nıñ sammitinde böyle paneller olacaq:

  • Qırımnı ilhaq etme ıntıluvnıñ tanımamazlığı aqqında;
  • Azaq-Qara deñiz bölgesiniñ arbiyleştirilüvi aqqında;
  • insan aqları ve turğun inkişaf yolunen Qırımnıñ reintegratsiya yolları aqqında;
  • qırımtatar halqınıñ aqlarınıñ tiklenilmesi aqqında.

Onıñ qayd etkenine köre, temsilcileri Kyivge kelip olamaycaq devletler Sammitte qabul etilecek beyannamege qoşula bilecek.

«Qırım platforması» sammitini qırımtatar asıllı ukrain yırcısı Jamala «1944» yırınen açacaq. Bu aqta UNN neşiri Ukraina Tış işler naziriniñ birinci muavini Emine Cepparnıñ malümatına esaslanıphaber ete.

Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.

Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.

«Qırım platforması»

Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.

2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.

Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.

Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.

2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.

Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.

Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.

XS
SM
MD
LG