Qırımnıñ Rusiye insan aqları vekâletlisi Lüdmila Lubina FSB tahqiqat organlarına muracaat etip, qırımtatar faali Edem Bekirovnı Aqmescit SİZOsından ev apsine avuştırmasını rica etecek. Bu aqta o, Qırım.Aqiqat mühbirine bildirdi.
«Bekirovnı aytsaq, insan hasta, belli qıyınlıqları bar ve men aq qorçalayıcı ve insansever olaraq bu muracaatlarnı tekrarlarım, elbette, (Bekirovnıñ ev apsine avuştırılmasına dair muracaat – QA) yazarım. İmaye istey, problem degil», – dedi o.
Lubinanıñ qayd etkenine köre, o, Rusiye ombudsmeni Tatyana Moskalkovanıñ Bekirovnı ev apsine avuştırmaq kerek kibi beyanatalarını bile.
«FSB tahqiqatçısından, reberlikten vekâletliniñ (Moskalkovanıñ beyanatı aqqında laf kete – QA) muracaatı aqqında ne tüşüneler, dep soradım. Olar bir şey körmediler, bir şey bilmeyler ve şimdilik (Bekirovnı ev apsine avuştırmağa – QA) planlaştırmaylar, dep aytqanlar. Tatyana Nikolayevnanıñ aytqanları bu onıñ niyetidir, belki, daa areket etecek, muracaat etecek», – dedi Lubina.
Onıñ aytqanına köre, bundan evel de Bekirovnıñ ev apsi aqqında rica etken edi.
«Tek Bekirovnen oğraşam, bunıñ kibi muracaatlarım oldı, tahqiqat organları maña qulaq asmadılar. Elimden kelgenini yapacam, çünki birinci derece saqatı ola, böyle hastalıqlarnen çekişe. Belki, daa bir kere (muracaat yollasam – QA), (tahqiqat organları – QA) bizni eşitir. Sizge şimdilik doğrusını aytayım, Bekirovnıñ meselesi çezilecek. Qaysı tarafqa ve nasıl – çoq laf etmege istemeyim», – dedi ombudsmen.
Rusiye ombudsmeni Tatyana Moskalkova Kreml kontrolindeki Aqmescit Kiyev rayon mahkemesi apiske alınğan qırımtatar faali Edem Bekirov içün sıñırlav tedbirini Aqmescit SİZOsında tutuv yerine ev apsini belgilemesini «ister edi», dep ayttı Qırım.Aqiqat muhbirine.
Daa soñra advokatlar Aleksey Ladin ve İslâm Velilâyev Rusiye ombudsmeni Tatyana Moskalkovadan qırımtatar faali Edem Bekirovnıñ Aqmescit SİZOsından ev apsine avuştırılmasına yardım etmesini rica etti.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
