Rusiye ombudsmeni Tatyana Moskalkova Kreml kontrolindeki Aqmescit Kiyev rayon mahkemesi apiske alınğan qırımtatar faali Edem Bekirov içün sıñırlav tedbirini Aqmescit SİZOsında tutuv yerine ev apsini belgilemesini «ister edi», dep ayttı. Bu aqta o, Qırım.Aqiqat mühbiriniñ imayeniñ sıñırlav tedbirini yımşatmaq muracaatları aqqında sualine cevap berip bildirdi.
«Mahkeme yerine cevap berip olamayım, amma böyle qararnıñ qabul etilmesini ister edim, çünki birinci derece saqatı ola, ve ev apsi cinaiy dava tahqiqatına keder etmeycek», – dedi Moskalkova.
Rusiye ombudsmeni, Edem Bekirovnıñ davası onıñ ayrı kontroli altında buluna, dep qoştı.
«Menim ayrı kontrolim altında buluna. Onıñ (Edem Bekirovnıñ – QA) kamerada yatqan kişini deñiştirmek muracaatları olğan edi, şimdi onıñ yanında bir tatar qala. Tedaviylev kursını deñiştirüv (muracaatı – QA), video kameralarını alıp taşlav, şahsiy alanı, mesele çezildi. Bugünki künde hastahanede buluna (Aqmescit SİZOsınıñ tibbiy bölügi aqqında aytıladır – QA), hastahane odasında eki insan qala. Şimdilik onıñ şikâyetleri, rica ve muracaatları yoq», – dedi Moskalkova.
Edem Bekirovnıñ hastahanege avuştırılmasına dair haberni ne tuvğanları, ne de advokatı tasdıqladı. Qırım.Aqiqat tafsilâtlı malümat almağa tırışa.
Mart ayında belli olğanı kibi, Rusiye quvetçileri Qırımda tutqan ve silâ ve patlayıcı maddelerni qanunsız saqlağanında qabaatlağan qırımtatar faali Edem Bekirov Aqmescit SİZOsınıñ kamerasından tibbiy bölügine avuştırıldı.
Malüm ki, Ukraina Yuqarı Radasınıñ insan aqları vekâletlisi Lüdmila Denisova Rusiye ombudsmeni Tatyana Moskalkova ile Rusiyede apiste tutulğan Edem Bekirov, Volodımır Baluh ve Volodımır Dudkağa mustaqil tibbiy teşkerüv temin etilüvi aqqında añlaştı.
Bundan evel qırımtatar faali Edem Bekirov, «ukrain «diversantları» davasınıñ mabüsi Vladimir Dudka ve ukrain faali Volodımır Baluhnıñ sağlıq vaziyeti fenalaştı, dep haber etilgen edi.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
