Link açıqlığı

Saatnıñ esas haberi

Ukraina ve Rusiye ombudsmenleri Bekirov, Baluh ve Dudkanıñ mustaqil ekimler tarafından baqılması aqqında añlaştı


Ukraina Yuqarı Radasınıñ insan aqları vekâletlisi Lüdmila Denisova
Ukraina Yuqarı Radasınıñ insan aqları vekâletlisi Lüdmila Denisova

Ukraina Yuqarı Radasınıñ insan aqları vekâletlisi Lüdmila Denisova Rusiye ombudsmeni Tatyana Moskalkova ile Rusiyede apiste tutulğan Edem Bekirov, Volodımır Baluh ve Volodımır Dudkağa mustaqil tibbiy teşkerüv berilüvi aqqında añlaşqanlarını bildirdi.

Bu aqta Denisova iyülniñ 15-nde Kyivde Moskalkova ile keçirgen brifingde ayttı.

«Azatlıqtan marum etüv yerlerinde bulunğan ayrı vatandaşlarınıñ tibbiy yardımını temin etüv meselesinde añlaştıq. Edem Bekirov, Pavlo Ğrıv, Volodımır Baluh, Vladimir Dudka ve Stanislav Klıhnıñ meselelerini baqtıq. Moskalkova vatandaşlarımıznı baqtırmaq içün mustaqil ekimlerni kirsetüv meselesini baqacaq, dep keliştik», – dedi Denisova.

Onıñ bildirgenine köre, Rusiye ve ilhaq etilgen Qırımda bulunğan Ukraina vatandaşlarını qaytaruv mehanizmi de muzakere etildi.

Bundan evel qırımtatar faali Edem Bekirov, «ukrain «diversantları» davasınıñ mabüsi Vladimir Dudka ve ukrain faali Volodımır Baluhnıñ sağlıq vaziyeti fenalaştı, dep haber etilgen edi.

Dudkanıñ oğlu İlya babası «gipertonik kriz telükesi altında buluna», dep bildirgen edi. Bekirovnıñ advokatı Aleksey Ladin müvekkili «qan şekeri yükselir dep, pek az aşay», dep aytqan edi. Advokat Olga Dinze Volodımır Baluhnıñ sağlıq vaziyeti «yahşı degil», dep tarif etti. O, ağrıları olğanını şikâyet ete, ayağı şişti.

2016 senesi noyabrniñ 9-nda Aqyarda «Nomos» Qırım analitik merkeziniñ hadimleri Dmitriy Ştıblikov, Aleksey Bessarabov ve yaqın dostu Vladimir Dudka tutulğan edi. Üçü de Ukraina istihbaratınıñ isteginen Qırımda diversiya azırlağanında qabaatlandı.

Rusiye kontrolindeki Aqyar şeer mahkemesi aprelniñ 4-nde «ukrain diversantları» davasınıñ» mabüsleri Vladimir Dudka ve Aleksey Bessarabovnı 14 yılğa üküm etti. Mahkeme er birine para cezasını da berdi: Dudkağa – 350 biñ ruble, Bessarabovqa – 300 biñ ruble.

Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.

Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.

Volodımır Baluh – qırımlı çiftçi, ukrainalı cemaat faali, Ukrain milletçileri kongressiniñ azası. Rusiye Qırımnı ilhaq etken soñ Rusiye vatandaşlığından vazgeçti. 2013 senesi qışta evinde Ukraina bayrağını astı, daa soñra «Sema Yüzü qaramanları soqağı» levhasını tikledi.

2016 senesiniñ soñunda Volodımır Baluhnı Rusiye FSBsiniñ hadimleri tutıp aldı. Olar Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Rusiye kontrolindeki Qırım mahkemesi onı 5 yılğa azatlıqtan marum etti – eki cinaiy dava boyunca: silâ saqlaması ve «Aqşeyh vaqtınca tutuv izolâtorınıñ yolbaşçısını köteklev» dep adlandırılğan adise.

Baluh qabaatını tanımayıp, açlıqqa başlağan edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. «Memorial» aq qorçalayıcı merkezi Volodımır Baluhnı siyasiy mabüs olaraq tanıdı.

XS
SM
MD
LG