Qırım Muhtar Cumhuriyeti ve Aqyar Milliy politsiyasınıñ Baş idaresi iyünniñ 19-nda Rusiye quvetçileriniñ Qırımnıñ Qarasuvbazar rayonında qırımtatarlarnıñ evlerinde keçirgen tintüvleri sebebinden cinaiy tahqiqat açtı.
Bu aqta Qırım Muhtar Cumhuriyeti prokuraturasınıñ matbuat hızmeti haber ete.
«Qayd etilgen qanunsız tintüvler keçirilgen vaqıtta mesken tiyilmemezliginden cinaiy tahqiqat başlatıldı», – dep aytıla müessise haberinde.
İyunniñ 19-nda Qırımnıñ Qarasuvbazar rayonındaki Sarı-Su köyünde Rusiye quvetçileri eki evde tintüv keçirdi. «Qırım birdemliginiñ» malümatına köre, tintüvler neticesinde kimse tutulmadı.
Akseit Cancakovnıñ evi ve anasınıñ evi tintildi.
Qırımtatar Milliy Meclisiniñ reisi, Ukraina halq deputatı Refat Çubarovnıñ fikirince, işğal etilgen Qırımda «qırımtatarlarğa qarşı total tarama devam ete». O, iyünniñ 19-nda Qırımda Qarasuvbazar rayonınıñ Sarı-Su qasabasında eki evde keçirilgen tintüvlerni izaatladı. O, «Rusiye quvetçileri tarafından qırımtatarlarnıñ evlerinde tintüv keçirilgen, Rusiye mahkemeleri tarafından qırımlılarğa uzun apis cezaları berilgen» işğal etilgen Qırımdaki vaziyetten sebep Ukraina akimiyetini BM Havfsızlıq şurasınıñ acele toplaşuvınıñ teşebbüsçisi olmasına çağırdı.
Qırımdaki müessiseler bu malümatnı daa izaatlamadı. Qırım.Aqiqat tafsilâtlı malümat almağa tırışa.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
