Qırımtatar Milliy Meclisiniñ reisi, Ukraina halq deputatı Refat Çubarovnıñ fikirince, işğal etilgen Qırımda «qırımtatarlarğa qarşı total tarama devam ete».
O, iyünniñ 19-nda Qırımda Qarasuvbazar rayonınıñ Sarı-Su qasabasında eki evde keçirilgen tintüvlerni izaatladı.
«Bugün saba olğan adiselerden soñ, Rusiye işğalcileri Qarasuvbazar rayonında tintüv keçirmege kelgende… Qırımda qırımtatarlarğa qarşı total, kütleviy av başlağanını tanımaq kerek. Qırımtatarlarğa qarşı tarama yapıla. Rusiyeniñ maqsadı – qırımtatarlarnı basıp quvmaqtır», – dedi o Facebooktaki video izaatında.
Qırımdaki müessiseler Sarı-Sudaki tintüvlerni daa izaatlamadı. Qırım.Aqiqat tafsilâtlı malümat almağa tırışa.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
