İlhaq etilgen Qırımda qurucılar, Keriç köprüniñ yanında demiryol tonneliniñ töşemesini bitirdi, Bu aqta Qırım matbuatı bildirmekte.
“Bu - Keriç köprü, onıñ demiryol qısmı yanında qurulğan inşaatlardan eñ müimi. Soçi olimpiadasından soñ bu birinci demiryol tonneli. Soçideki qısqaca edi - 400 metrge qadar. Menimce, bu kibi inşaatnı soñki 5-8 yıl devamında Rusiyede kimse qurmağan”, - dedi Rusiye Naqliyat naziri Yevgeniy Ditrih.
Demiryol tonneli Keriç köpründe 6 kilometr uzaqlığında buluna. Onıñ uzunlığı - 1000 metr, keñligi - 10,6 metr, öksekligi - 8,6 metr. İnşaat 9 balğa qadar zelzelege dayana bile. Tonnelde eki demiryol hatını keçirecek olalar.
Oktâbrniñ 4-nde yapılarnıñ qurğulanuvı vaqtında Keriç köprü demiryol qısmınıñ közü suvğa tüşti.
Keriç boğazındaki köpürniñ maşna qısmı mayısnıñ 16-nda yengil maşnalarğa açılğan edi. Oktâbr 1-inde yük naqlitatı yürüşi açıldı. Köpürniñ demiryol qısmı soñuna qadar daa qurulmadı.
Ukraina prezidenti Petro Poroşenko, Rusiye işğal etken Qırımda Keriç köprüniñ qanunsız qurucılığı Kreml tarafından halqara uquq bozulğanınıñ daa bir delili ola, dep aytqan edi.
Avropa Birligi ve AQŞ Rusiye ve işğal altındaki Qırım arasında Keriç köprüniñ qısmen açılışını tenqit ettiler. Ukraina tarafı, 2014 senesi Qırım işğalinden soñ Rusiye ile köpür qurucılığana dair añlaşmadan çıqqan edi.
