"Qorqu, telâş, suçlularnı tapma ıntıluvları". Rusiye quvetçileri Qırımda qırımtatar faallerine tazyıqnı arttırdı

AQMESCİT – Rusiye quvetçileri Qırımda qırımtatarlar yaşağan yerlerde nezaretni arttırdı. Bunı işğal etilgen yarımadanıñ bölgelerinde vaziyetniñ taliliniñ neticelerine köre "Qırım ğayesi" cemaat areketiniñ faalleri bildirdi. Bu sebepten Qırım.Aqiqat Rusiye quvetçileriniñ Qırım yarımadasındaki areketleriniñ sebebi ne olğanına dair qırımtatar faalleriniñ fikrini ögrenmek qararına keldi.

Aprelniñ 25-nde Rusiye quvetçileri "Qırım ğayesi" cemaat areketiniñ yaratılmasınıñ başında turğan qırımtatar uquq qoruyıcısı Abdureşit Cepparovnıñ Qarasuvbazardaki evinde tintüv keçirdi ve onı yaqaladı. Qırımtatar uquq qoruyıcısı ve jurnalist Lutfiye Zudiyevanıñ fikrindce, Cepparovnıñ faaliyeti "quvetçilerniñ siñirine tiye edi". Onıñ sözlerine köre, uquq qoruyıcılar, jurnalistler, advokatlar Qırımda "telüke gruppasındalar".

Qırımtatar faali Erfan Kudusov Qırım.Aqiqatqa izaat berir eken, Rusiye quvetçileri böyle etip Qırımda Ukrayina destegine tirenüvniñ artmasını toqtatmağa tırışqanlarını bildirdi.

"Qırım ğayesi" tasvir etken vaziyet añlaşılğan. Birincide, Qırımda işğalciler arasında telâş artmaqta. Artqan nezaret, mahsus hızmet organlarınıñ gece-kündüz işine keçmesi ve yalı boyu yüzlerce kilometr okop qazılması bunıñ alâmetleridir... Ekincide, qırımtatar ealisi Qırımda işğal akimiyetine eñ çoq loyal olmağan olaraq qala, bu sebepten quvetçiler qırımtatarlar USQ-ni qarşılamağa azırlana dep şübelene. Olar vaziyetni nezaret etmege ve yerastı areketini bastırmağa tırışa. Bu sebepten izaatlar sadedir - telâş, raatsız areket tarzı, suçlularnı tapma ıntıluvlar. Bu vaziyette qırımtatarlarnıñ zapt etilüvleri arttı, Rusiye quvetçileri buña tevqif deyler. Bütün bular riatkâr olmağan qırımlılarnı totalitar redim ile qorqutma elemetleri ve Rusiye tarafdarı olğan qatlamlarnıñ telâşlı alını toqtatma ıntıluvları", - dedi faal.

Ukrayina Prezidentiniñ Qırım MC Daimiy temsilciliginde iş tecribesi olğan #LiberateCrimea halqara areketiniñ faali Ruslan Seydametovnıñ fikrince, qırımtatar faallerine tazyıq artmasınıñ sebebi Rusiye quvetçileriniñ Ukrayina Silâlı quvetleriniñ qarşı ücümi ögünde qorqusıdır.

"Menimce, bu qorqu alâmetidir. Rusiye ordusı bir qaç ciddiy mağlübiyetke oğradı ve büyük ğayıpları olsa bile bir şeyge irişip olamay. Amma şimdi er kes bu cenkniñ ketişatını ve aqibetlerini deñiştire bilecek USQ qarşı ücümi aqqında dey. Onı er kes bekyley, işğalciler de. Soñkileri hususan, çünki buña olarnıñ taqdiri bağlı. Tış körünişinden sakin kibi körüngen işğalciler USQ daa bir bir ğalebesinden pek qorqalar, çünki bu olarnıñ yaşayışını deñiştirecek ve bir çoq ümütlerinden marum etecek. Bu sebepten preventiv tedbirlerni ve olarğa loyal olmağan qırımtatar faallerine qarşı tazyıqnı arttıra", - dedi o.

Qırımtatar faali, sabıq siyasiy mabüs İsmal Ramazanov, Qırımda qırımtatarlarğa qarşı tazyıq Ukrayina Silâlı Quvetlerniñ cebedeki muvafaqiyeti vaziyetinde quvetleşkenine emin.

"Qırımda qırımtatar halqına qarşı basqılar iç bir vaqıt da toqtamağan edi. İşğalciler Qırımnıñ tamır qırımtatar halqına qarşı nefretini gizlemeyler bile ve böyle fırsat olğance öz basqılarını arttırmağa devam etecekler. Eger şimdi Ukrayina devleti Qırımda qırımtatar milliy muhtariyetniñ yaratılmasını ilân etse edi, bu, bütün Qırım sakinlerine Ukrayina devletiniñ bütünligi oğrunda küreşni quvetleştirmek içün küçlü işaret olur edi. Qırımdaki soñki adiseler vaziyetinde çılğın rejimge yalıñız qırımtatarlar degil de, ruslar bile tirenip başlay. İşğalden evel ve soñ yaşayışnı qıyaslap ruslar bile Ukrayina faydasına hulâsa çıqardı. Olar Putitnniñ çılğın ğayeleri sebebinden boz zonada yaşamağa istemeyler. Şunıñ içün Qırımda tirenüv ketken sayın ep artacaq. Qırımlılar yarımadanıñ işğalden azat etilüvini beklegenlerini ve öz qurtarıcılarını qırımtatar ve ukrayin bayraqları ile qarşılaycağını bilem", - dedi Ramazanov.

"Qırım birdemligi" cemaat birleşmesiniñ faali Enver Şerfiyev, Rusiye quvetçileriniñ qırımtatar faallerine diqqatınıñ artması Qırımnıñ mudafaasına azırlıq ile bağlıdır, dey.

"İşğalciler Qırımda faal mudafaağa azırlanalar, şunıñ içün qırımtatar faalleriniñ taqip etilmesi başından olarnıñ işğal akimiyetini tanımağanları ve Rusiye akimiyetine loyalsiz qalmağa devam etkenleri ile bağlıdır dep belleyim. Bunıñ eñ parlaq misali de, 2014 senesi fevralniñ 26-nda keçirilgen mitingdir ve halqımnıñ sahte referendumda iştirak etmegenidir. Qırım akimiyeti ve olarnıñ Kremldeki kuratorları bütün bularnı hatırlay ve 9 yıl devam etken işğalge baqmadan halqımnıñ ekseriyetiniñ noqta-i nazarı 2014 senesideki ile aynı olğanını bile", - dedi o.

MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.