QMC Yuqarı Şurasınıñ sabıq başı, "Rusiye kommunistleri" partiyasınıñ Qırım bölüginiñ başı Leonid Graçnıñ COVID-19 hastalığına oğradı. Bu malümatnı Qırım.Aqiqatqa Graçnıñ özü tasdıqladı.
"Yazıq ki, ebet. Menim koronavirus infektsiyam bar". - dedi Graç.
Siyasetçi, 8 künden berli 7-nci Aqmescit hastahanesinde olğanını qoştı.
Qırımda keçken künü 43 yañı koronavirus hastası qayd etildi.
Umumen, yerli akimiyetniñ malümatına köre, Qırımda 2625 yañı koronavirus hastası qayd etildi, 91-i çetelden keldi, 124-ü qomşu Rusiyeden kelgenler ve olarnen alâqada olğanlar. 1997 kişi tibbiy yardımğa muracaat etkende belli oldı, daa 413 ise sağlam adamlarnıñ laboratoriya skriningi vaqtında belli oldı.
Keçken aylarda Qırımda bir künde qayd etilgen koronavirus hastalarınıñ sayısında altı kere rekord qayd etilgen edi, eñ çoq hasta (84) avgustnıñ 27-nde oldı. Qırımda koronavirus hastalarınıñ sayısı eñ yüksek raqamlarda sentâbrniñ ortasına qadar olacaq, dep bekleyler.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
