Rusiye kontrolindeki Qırım akimiyeti eñ yaqın eki aftada koronavirus hastalarınıñ sayısı artacaq, soñra ise yuqunç tarqaluv raqamları eksilecek, dep bekley, dep bildirdi Qırımnıñ Rusiye yolbaşçısı Sergey Aksenov.
«Mevsim endi bite, çoqusı endi ketti. Sentâbrniñ 1-i başlağanını köz ögüne alsaq. Hasta sayısı daa az olacaq, dep ümüt etemiz. Eki aftalıq müddet bitecek, ve sentâbrniñ 14-ne, mence, eñ yüksek raqamlar olacaq. Soñra eksilecek», – dep yazdı Aksenov Facebookta.
Keçken aylarda Qırımda bir künde qayd etilgen koronavirus hastalarınıñ sayısında altı kere rekord qayd etilgen edi, eñ çoq hasta (84) avgustnıñ 27-nde oldı. Operativ ştabnıñ soñki malümatına köre, Qırımda tahminen 2,5 biñ koronavirus hastası qayd etildi. 1,6 biñden çoq kişi tüzeldi, 30 insan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
