QMC ve Aqyar şeeriniñ prokuraturası, Qırımtatar Milliy Meclis reisiniñ muavini İlmi Ümerovğa üküm çıqarğan qadığa qarşı qabaatlav aktını mahkemege yolladı.
«Mahsus azırlıq tahqiqat olaraq, Qırım MC Aqmescit rayon mahkemesiniñ sabıq qadısına qarşı Ukraina Ceza Qanunnamesiniñ 111-nci maddesiniñ 1-nci qısmına binaen (devlet hainligi) mahkemege qabaatlav aktını yiberdi. Mezkür Ukraina vatandaşı Rusiye Federatsiyasınıñ qanunlarına köre areket etip, 2017 senesi sentâbrniñ 27-nde qanunsız üküm çıqardı, oña köre Qırımtatar Milliy Meclis reisiniñ muavini eki yıl apis cezasına mahküm etildi», – dep yazıla bildirmede.
Qadınıñ qabaatı tasdıqlanğan taqdirde, o, 12-15 yıl apis cezasına mahküm etile bile. khadınıñ adı beyanatta añılmay.
Qırım Muhtar Cumhuriyeti ve Aqyar prokuraturası Qırımtatar Milliy Meclisiniñ reis muavini İlmi Ümerovnıñ taqip etilüvine alâqası olğan qadığa qarşı qabaatlayıcı qararnı mahkemege yolladı.
2016 senesi FSB tahqiqatçıları İlmi Ümerovğa qarşı ekstremizm maddesine istinaden cinaiy dava açtı.
Kreml kontrolindeki Aqmescit rayon mahkemesi 2017 senesi sentâbrniñ 27-nde Umerovnı eki yıl yaşav tarzı koloniyasında qalmasına üküm etti. Onıñ kütleviy faaliyetnen oğraşması ve kütleviy haber vastalarında çıqış yapması eki yılğa yasaqlandı. Umerov oña qarşı açılğan cinaiy davanıñ siyasiy sebepleri bar, dep ayttı.
2017 senesi oktâbrniñ 25-nde Rusiye akimiyeti Qırımda mahküm etilgen Qırımtatar Milliy Meclisiniñ reis muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umerov ve Çiygoz Kyivge kelgenler.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
