Qırım Muhtar Cumhuriyeti ve Aqyar prokuraturası Qırımtatar Milliy Meclisiniñ reis muavini İlmi Umerovnıñ taqip etilüvine alâqası olğan qadığa qarşı qabaatlayıcı qararnı mahkemege yolladı. Bu aqta nezaret müessisesiniñ matbuat hızmeti bildire.
«Mahkemeden evelki tahqiqat, qabaatlanğan kişi Rusiye işğalci akimiyetiniñ tiklenmesine yardım etti ve yarımada işğalinen razı olmağan Ukraina vatandaşlarını taqip etken işğalci devletniñ siyasetini kerçekleştirüvde iştirak etti, dep hulâsa çıqardı», – dep aytıla haberde.
Bu malümatqa köre, Rusiye kontrolindeki Bağçasaray rayon mahkemesiniñ qadısı Rusiye qanunlarını qanunsız şekilde qullandı. Hususan qayd etilgen temsiliy organda iştirak etkeni içün Qırımtatar Milliy Meclisiniñ reberlerinden birine qarşı memuriy protokollarnıñ baqıluvında.
Şübheli qıdıruvğa ilân etildi. Maddege köre on eki yıldan on beş yılğa qadar apis cezası berile bile.
Qadınıñ adı ve soyadı qayd etilmey. Qabaatlanğan kişi ya da imayecileri açıq izaat bermey.
Daa evel berilgen malümatqa köre, Qırım Muhtar Cumhuriyetiniñ prokuraturası Rusiye işğal etken Qırımda Qırımtatar Milliy Meclisiniñ reis muavini İlmi Umerovğa üküm çıqarğan qadığa şübheli olğanını bildirdi. Laf Qırımnıñ Aqmescit rayon mahkemesiniñ qadısı aqqında kete.
2016 senesi FSB tahqiqatçıları İlmi Umerovğa qarşı ekstremizm maddesine istinaden cinaiy dava açtı.
Kreml kontrolindeki Aqmescit rayon mahkemesi 2017 senesi sentâbrniñ 27-nde Umerovnı eki yıl yaşav tarzı koloniyasında qalmasına üküm etti. Onıñ kütleviy faaliyetnen oğraşması ve kütleviy haber vastalarında çıqış yapması eki yılğa yasaqlandı. Umerov oña qarşı açılğan cinaiy davanıñ siyasiy sebepleri bar, dep ayttı.
2017 senesi oktâbrniñ 25-nde Rusiye akimiyeti Qırımda mahküm etilgen Qırımtatar Milliy Meclisiniñ reis muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umerov ve Çiygoz Kyivge kelgenler.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
