Ukraina Yuqarı Radasınıñ PACE eyyetiniñ reberi Mariya Mezentsevanıñ bildirgenine köre, o, Avropa Şurası baş kâtibi Marija Pejčinović Burićten Ukraina tarafınıñ Qırımda qırımtatarlarnıñ Rusiye quvetçileri tarafından taqip etilüvinen bergen muracaatına cevap aldı.
Mezentsevanıñ malümatına köre, AŞ baş kâtibi «Ukraina topraq bütünligi ve suverenitetine qoltutqanını tasdıqlay».
«O, işğal etilgen Qırımdaki insan aqları vaziyetine dair maruzası içün mektübimde tarif etilgenlerge emiyet bere. AŞ baş kâtibiniñ mandatına baqılsa, bu müim bir signal, çünki onıñ er yıllıq maruzası Avropa Şurasınıñ insan aqlarını qoruv saası siyasetinen bağlı uquqiy qatnı şekillendire. Mevzu esabatqa kirecek degen cevap aldıq», – dep yazdı Mezentseva Facebookta.
Onıñ hatırlatqanına köre, böyle mektüpler Avropa Şurası insan aqları komissarı Dunja Mijatović ve PACE reisi Rik Daemsqa da yollanıldı.
Daa evel berilgen malümatqa köre, sentâbrniñ 27-nden 30-na qadar Strasbourgda keçirilecek Avropa Şurası Parlament assambleyasınıñ küz sessiyasına «Qırımda tamır halqlarnıñ Rusiye tarafından siyasiy taqip etilüvi» aqqında meseleniñ muzakere etilmesi içün muracaat keldi.
Avropa Şurası Parlament assambleyası iyünniñ 23-nde Rusiye işğal etken Qırımda qırımtatarlarnıñ aqları aqqında qararnı qabul etti.
Rusiye Devlet dumasınıñ halqara işler komitetiniñ reisi Leonid Slutskiy Rusiye PACEniñ bu qararını yerine ketirmeycek, dep bildirdi.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
